Menu
Lúxusborgari með laukhringjum, beikoni og Dala hring

Lúxusborgari með laukhringjum, beikoni og Dala hring

Þessi útgáfa af grilluðum hamborgara er bara með þeim allra bestu þó ég segi sjálf frá. Stórir borgarar, grillaðir á blússandi hita á gasgrilli og á milli set ég m.a. laukhringi og stökkt beikon. Það allra besta er svo Dala hringurinn sem fer ofan á buffið. Ég sker ostinn þvert í sneiðar og grilla með síðustu sekúndurnar. Þvílíkt og annað eins gúmmelaði, þetta er klárlega borgari sumarsins!

Innihald

4 skammtar
hamborgarar, 140-170 g
hamborgarabrauð
salt og pipar
Dala hringur
laukhringir, ofnbakaðir eða djúpsteiktir
beikonsneiðar, stökkar
tómatsneiðar
súrar gúrkur
rauðlaukur, skorinn í sneiðar
ferskt salat
majónes og bbq sósa

Meðlæti

franskar, t.d. vöfflufranskar
sýrður rjómi með graslauk og lauk frá MS

Skref1

  • Byrjið á því að taka hamborgarana úr kæli og krydda með salti og pipar.
  • Steikið beikonið og djúpsteikið eða ofnbakið laukhringina.
  • Hitið grillið mjög vel, setjið borgarana á grillið og passið að loka alltaf grillinu til að hitinn haldist sem mestur.

Skref2

  • Skerið ostinn þversum þannig að hringurinn haldi sér.
  • Snúið borgurunum við og steikið áfram, rétt áður en þeir verða klárir setjið þið ostinn á og lokið grillinu. Leyfið ostinum að bráðna vel en samt án þess að hann leki út um allt.
  • Hitið brauðin á grillinu rétt áður en borgararnir eru tilbúnir.

Skref3

  • Þá er bara að setja veisluna saman!
  • Botnbrauð, bbq sósa, súrar gúrkur, rauðlaukssneiðar, hamborgarabuff, salat, tómatsneiðar, beikon, laukhringir, majónes á toppbrauðið og loka.
  • Ef þið eigið til prjón eða grillpinna er upplagt að stinga einum slíkum í gegnum borgarana.

Skref4

  • Borgararnir eru bestir með einhverjum góðum frönskum og ísköldum bjór (nú eða bara einhverjum öðrum ísköldum drykk). Ég dýfði frönskunum í sýrða rjómann með graslauk og lauk og það er alveg geggjað kombó!
Skref 4

Höfundur: Valgerður Gréta Gröndal