Lasanjasúpa með mascarponekremi

Skref1

• Saxið lauk, gulrót og sellerí smátt og saxið eða pressið hvítlaukinn.
• Hitið ólífuolíu í stórum potti og steikið lauk, sellerí og gulrót við meðalhita í um 5 mínútur, þar til grænmetið er farið að mýkjast. Bætið hvítlauknum út í og steikið áfram í um 30 sekúndur.
• Bætið nautahakkinu út í og steikið þar til það hefur brúnast vel. Kryddið með salti og svörtum pipar.
• Bætið tómatpúrrunni út í og steikið með hakkinu í 1–2 mínútur. Bætið oregano, basilíku og chiliflögum saman við og hrærið vel.

Skref2

• Hellið hökkuðum tómötum, passata og 5 dl af vatni út í.
• Bætið nautakraftsteningnum saman við og hrærið vel.
• Látið súpuna malla við vægan hita í um 15 mínútur.
• Brjótið lasanjaplöturnar í óreglulega, frekar stóra bita og bætið út í súpuna. Látið malla þar til pastað er al dente, í um 10–12 mínútur eða samkvæmt leiðbeiningum á umbúðum.
• Hrærið reglulega svo pastað festist ekki saman eða við botninn.
• Bætið meira vatni út í eftir þörfum þar til súpan hefur þá þykkt sem óskað er eftir.

Skref3

• Á meðan súpan mallar, útbúið mascarponekremið.
• Hrærið mascarpone og fínrifnum Feyki saman í skál og kryddið með nýmöluðum svörtum pipar og mögulega smá salti. Ef kremið er of þykkt má bæta 1–2 tsk. af mjólk saman við. Kremið á að vera mjúkt og rjómakennt en samt nógu þykkt til að halda lögun.
• Smakkið súpuna til með salti og nýmöluðum svörtum pipar.
• Skiptið súpunni á milli skála og setjið nokkrar góðar skeiðar af mascarponekremi yfir. Toppið með fínrifnum Feyki, ferskri basilíku, nýmöluðum svörtum pipar og örlitlu af ólífuolíu. Berið strax fram.

Höfundur: Helga Ragnarsdóttir