Hægelduð svínasíða með rjómalöguðum baunum

Svínasíða

• Hitið ofn í 220 gráður.
• Skerið þverar rákir í puruna á svínasíðunni.
• Hitið um 1 lítra af vatni að suðu. Hellið heitu vatninu yfir puruna og þerrið kjötið að því loknu. Þetta er gert til að opna puruna og gera hana mögulega stökkari við eldun.
• Saxið rósmarínið smátt.
• Skerið hvítlaukinn í tvennt, þvert, án þess að afhýða hann.
• Afhýðið laukinn og skerið hann í tvennt, einnig þvert.
• Smyrjið kjötið og puruna með ólífuolíu, nuddið fennelfræum og rósmaríni vel í kjötið og inn í rákirnar á purunni. Gerið þetta sömuleiðis með saltið og piparinn.
• Leggið laukinn í botninn á djúpri ofnskúffu eða stóru fati sem þolir heitt. Setjið laukinn í tvær skipulegar raðir. Leggið kjötið ofan á laukinn þannig að það hvíli ekki í skúffunni. Þetta hindrar það að kjötið brenni við botninn og gerir soðið ennþá bragðbetra. Leggið hálfu hvítlaukana í kring. Stingið í 220 gráðu heitan ofninn í 20 mínútur.
• Að þeim tíma liðnum hellið þið helmingnum af kjúklingasoðinu í ofnskúffuna og setjið hana aftur í ofninn í 20 mínútur. Þá er hitinn á ofninum lækkaður í 130 gráður, afgangurinn af soðinu settur í ofnskúffuna og allt látið malla í ofni í 3 klukkustundir. Fylgist vel með matnum í ofninum, takið skúffuna út og ausið soði yfir á 20-30 mínútna fresti.
• Takið kjötið úr ofninum og látið það standa í 15 mínútur.
• Hellið soðinu í pott og ef þarf, skafið kryddskán úr botninum á ofnskúffunni í pottinn. Komið upp suðu og látið sjóða niður í nokkrar mínútur.
• Geymið soðið þar til maturinn er borinn fram.
• Skerið kjötið í sneiðar eða rífið það niður í smærri bita.

Rjómalagaðar baunir

• Látið renna vel af cannelini-baununum í sigti.
• Hellið ólífuolíunni á pönnu og bræðið smjörið með.
• Mýkið laukinn í 3 mínútur. Setjið hvítlaukinn saman við og mýkið áfram í tvær mínútur en gætið vel að því að hann brúnist ekki.
• Skvettið hvítvínsedikinu á pönnuna. Þá fer rósmarínið saman við og hrærið allt vel saman.
• Hellið rjómanum út í ásamt kjúklingasoðinu.
• Komið upp suðu og látið blönduna sjóða niður í nokkrar mínútur eða þar til hún hefur minnkað um 1/3.
• Hrærið baunirnar varlega saman við og hitið þær vel í gegn.
• Hrærið steinselju saman við og smakkið til með salti og pipar.

Samsetning

• Setjið baunir á disk fyrir hvern og einn, gott að nota djúpa diska.
• Kjötið fer ofan á baunirnar og vel af soðsósunni yfir allt saman.
• Njótið vel og lengi.

Afgangur - tagliatelle

• Sjóðið tagliatelle skv. leiðbeiningum eða annað pasta.
• Rífið kjötið niður í pott og hellið soði út í þannig að rétt fljóti yfir.
• Komið upp suðu og lækkið hitann. Sjóðið örlítið niður þar til blandan tekur að þykkna.
• Hrærið þá saman við 3-5 msk af rifnum parmesanosti, allt eftir smekk.
• Smakkið til með salti og svörtum pipar.
• Setjið pastað saman við sósuna og blandið vel.
• Berið fram og stráið parmesanosti yfir.

Höfundur: Halla Bára Gestsdóttir