Grillaðir humarhalar með hvítlaukssósu

Hvítlaukssósa

• Byrjið á því að setja heilan hvítlauk á álpappír og hella olíunni yfir og saltið. Innsiglið og bakið í 180 gráðu heitum ofni í 50 mínútur.
• Leyfið lauknum að kólna aðeins áður en þið farið að meðhöndla hann þar sem hann er ákaflega heitur.
• Á meðan hvítlaukurinn er að kólna setjið þið heila dós af sýrðum rjóma í skál.
• Hrærið sýrða rjómann saman við tvær matskeiðar af grískri jógúrt og svo sama magni af mæjónesi og hrærið vel saman.
• Hakkið graslaukinn og blandið honum saman ásamt öllum hvítlauknum - sem auðvelt er að kreista úr hýði sínu.

Grillaðir humarhalar

• Klippið humarinn upp eftir bakinu og hreinsið görnina frá og leggið humarhalann ofan á skelina.
• Penslið humarinn ríkulega með hvítlauksolíu, salti og pipar. Grillið í fimm til sex mínútur á blússheitu grilli eða inni í ofni.

Hvítlauksbrauð með piparosti

• Skerið baguette brauðið í tvennt, penslið með hvítlauksolíu, sneiðið piparostinn þunnt og leggið á brauðið.
• Setjið því næst rifinn ost ofan á og grillið í ofninum í nokkrar mínútur þangað til að osturinn er bráðinn.

Höfundur: Ragnar Freyr Ingvarsson