Crème Brûlée bolla

Skref1

• Byrjið á að búa til vanillukremið þar sem það þarf að kólna vel áður en það fer í bolluna. Sjóðið mjólk og rjóma í stórum potti upp að suðu og hafið aðra skál með vanillu, eggjarauðum, sykri og maizena tilbúna, hrærið því öllu vel saman.
• Þegar mjólkin er komin upp að suðu hellið þið smá af henni út í blönduna í skálinni og hrærið saman. Setjið allt í skálinni síðan aftur í pottinn og hrærið núna stanslaust þar til kremið fer að sjóða og hefur þykknað.
• Leggið til hliðar og leyfið að kólna.

Skref2

• Búið næst til vatnsdeigsbollurnar.
• Hitið mjólkina, vatnið, smjörið og sykurinn upp að suðu.
• Bætið hveitinu saman við og hrærið stanslaust þar til filma myndast á botninum á pottinum og deigkúla fer að myndast úr deiginu. Mikilvægt er að nota brauðhveiti svo bollurnar falli ekki og haldi formi. Deigið á að losna vel frá hliðum pottsins þegar það er tilbúið.
• Færið deigið í hrærivélaskál og hrærið þar til deigið er orðið volgt og þið getið snert það án þess að finna hita.
• Hrærið saman eggin og saltið til að brjóta upp eggin og blanda þeim vel saman við saltið.
• Bætið eggjunum saman við í nokkrum skömmtum og hrærið vel inn á milli. Hrærið þar til deigið er ekki lengur stíft en heldur þó enn þá formi. Þegar það lekur af sleifinni í einskonar V formi þá er það tilbúið.

Skref3

• Sprautið deiginu á pappírsklædda plötu með góðu millibili.
• Stillið ofninn á 220°C.
• Þegar ofninn er tilbúin eru bollurnar settar inn í ofninn og hitinn lækkaður í 190°C í 15 mínútur.
• Eftir 15 mínútur er hitinn lækkaður í 170°C og bollurnar bakaðar áfram í 15-20 mínútur eða þar til þær eru gullinbrúnar og búnar að mynda góða skorpu að utan

Skref4

• Skerið nú bollurnar til helminga og léttþeytið rjómann.
• Fyllið botninn á bollunum með vanillukremi og sprautið svo rjómanum á bolluna.
• Búið til glassúr úr flórsykri og vatni og dýfið toppnum á bollunni ofan í glassúrinn og svo ofan í sykurinn.
• Setjið lokin á bollurnar og notið gasbrennara til að brenna sykurinn.

Höfundur: Elenora Rós Georgesdóttir