- +

Klassískt salat með fersku ívafi og góðum tilbrigðum

Innihald:
Klettasalat eða romain-salat
basilíka, rifin eða söxuð
kóríander, laufin tekin af stilkunum
góð ólífuolía
salt og svartur pipar
tómatar, sneiddir /kirsuberjatómatar
mangó, skorið í teninga
mozzarella, rifinn niður
maukuð, hrein kotasæla eða ricottaostur
balsamikedik

Aðferð:

Eins og með öll salöt má fabúlera endalaust, breyta og bæta eftir smekk og hvort salatið er borið fram sem meðlæti eða aðalréttur. Hér er ekki tilgreint magn, heldur er frekar um hugmynd að ræða, eins og á við svo oft um salöt. Viðbót í salatið getur verið ristaðar furuhnetur, balsamikgljáðar pecanhnetur, hráskinka, bresaola-sneiðar, plómur, ferskjur, bláber. Einnig kjúklingur í einhverju formi. Í stað þess að bera Kotasæluna fram á hefðbundinn hátt er betra að mauka hana og hafa hana fínni í forminu.

Hrærið saman salat, basilíku og kóríander og leggið á disk. Dreypið olíu yfir, setjið örlítið salt og pipar. Stingið tómötum hér og þar, dreifið mangói yfir sem og mozzarella. Setjið litlar kúlur af kotasælu á miðju disksins. Dreypið ediki yfir. Berið fram. 

 

Höfundur: Halla Bára og Gunnar