Menu

Lambakótilettur á marokkóska vísu með tómatsalati

Það er hægt að gera ansi mikið meira úr íslensku lambakótilettunum en að elda þær upp á gamla móðinn, þótt það standi ávallt fyrir sínu. Hér eru þær í marokóskri kryddblöndu og bornar fram með fersku tómatsalati með fetaosti. Athugið að þessi kryddblanda er mjög góð á allt lambakjöt og kjúkling.

Innihald

6 skammtar

Kótilettur:

kótilettur (12-16)
heil kúmínfræ
sæt paprika, duft
chillí, duft
gott sjávarsalt
brætt smjör

Tómatsalat:

kirsuberjatómatar
rauðlaukur, fínt saxaður
fetaostur
ferskt eða þurrkað óreganó
svartar ólífur

Dressing:

hvítlauksrif
sjávarsalt
rauðvínsedik
kirsuberjatómatar
extra virgin ólífuolía
salt og svartur pipar

Kótilettur

  • Hrærið allt kryddið saman í morteli og myljið aðeins saman.
  • Rétt áður en á að elda kótiletturnar, smyrjið þær með bræddu smjöri og veltið þeim upp úr kryddinu.
  • Kótiletturnar má bæði grilla og steikja á pönnu, ekki elda þær alveg í gegn því best er að stinga þeim í heitan ofn í 5-10 mínútur áður en þær eru bornar fram.
  • Hellið afganginum af brædda smjörinu yfir kótiletturnar áður en þær fara í ofninn og eins má strá kryddblöndunni yfir.
  • Því meira krydd í smjörinu því betra, því smjörið í ofnfatinu er notað sem sósa til að dreypa yfir kjötið.
  • Það má einnig bera kryddið fram með matnum.

Tómatsalat

  • Maukið hvítlauk og salt vel saman.
  • Maukið tómatana í matvinnsluvél.
  • Hrærið þá saman hvítlaukinn, tómatmaukið og allt annað hráefni í dressinguna.
  • Blandið öllu saman sem fer í salatið og hellið dressingunni yfir. Piprið aðeins með svörtum pipar.
  • Berið fram með kótilettunum en athugið að þetta salat er mjög gott með ýmsu öðru.

Dressing

  • Maukið allt í matvinnsluvél og hellið dressingunni yfir salatið.

Höfundur: Halla Bára Gestsdóttir