Lambafillet með stökkri puru og bernaise sósu | gottimatinn.is
- +

Lambafillet með stökkri puru og bernaise sósu

Innihald:
1200 g lamafillet (1 stk á mann)
Gott sjávarsalt
Nýmalaður pipar
2 stk ferskar timjan greinar (2-3 stk)
1 dl ólífuolía
50 g smjör

Aðferð:

Ef ætlunin er að hafa lambakjöt í kvöldmat er gott að taka það úr ísskápnum að morgni. Snyrta bitana, skera af auka fitu og sinar ef einhverjar eru og skera í fituna tíglamynstur niður að kjötinu. Gætið þess að skera ekki í kjötið sjálft. Kjötið er svo kryddað vel með salti og pipar. Sett í fat og ólífuolíu hellt yfir kjötið og því velt vel upp úr olíunni. Svo er fatið sett inn í ísskáp, engin filma yfir og fituhliðin látin snúa upp.

1 klst áður en kjötið er eldað er gott að taka það úr ísskápnum og leyfa því að ná stofuhita.

Hitið ofn í 180 gráður. Bræðið 50 gr af smjöri á pönnu við meðalháan hita, setjið timjan greinarnar í smjörið og leyfið þeim að krauma með. Steikið kjötið svo á fituhliðinni í smjörinu í góðar 4 mínútur eða þar til puran er gullin og stökk. Snúið þá kjötinu við og stingið inn í ofn í 10-12 mínútur. Þá ætti steikin að vera fallega bleik í miðjunni. Ef þið viljið gegnsteikja kjötið er vissara að hafa það í 15-17 mínútur í ofninum.

Þegar kjötið er tekið út er smjörinu og fitunni, sem er á pönnunni, ausið yfir kjötið. Leyfið því svo að standa í 10 mínútur áður en það er skorið. 

Berið fram með bernaise-sósu og bragðmiklum hasselback-kartöflum með osti og bökuðum rauðlauk.

Höfundur: Helena Gunnarsdóttir