Candy Cane ostamús | gottimatinn.is
- +

Candy Cane ostamús

Innihald
12 stk. Oreo kexkökur
3 msk. smjör, bráðið
100 g hvítt súkkulaði
300 ml rjómi
8 msk. flórsykur
280 g Gott í matinn rjómaostur
1 tsk. myntudropar

Aðferð:

Setjið Oreo kexkökur í matvinnsluvél og hakkið þar til þær verða fínmalaðar.

Bræðið smjör og hrærið saman við Oreo kexkökurnar. Setjið 1-2 msk af Oreo í hvert glas fyrir sig og þjappið örlítið kexblöndunni niður í botninn.

Bræðið hvítt súkkulaði yfir vantsbaði eða yfir lágum hita þar til súkkulaðið hefur náð að bráðna alveg. Setjið súkkulaðið svo til hliðar á meðan þið undirbúið rest og látið súkkulaðið ná stofuhita.

Þeytið rjóma þar til hann er nánast stífur og blandið flórsykri saman við og hrærið með sleif.

Hrærið rjómaost þar til hann verður mjúkur og sléttur.

Blandið hvíta súkkulaðinu saman við rjómaostinn og hrærið vel saman ásamt myntudropunum.

Blandið rjómanum varlega saman við og hrærið með sleif þar til allt hefur blandast vel saman.

Ef þið viljið hafa ostamúsina tvílita þá þurfið þið sprautupoka. Dýfið tannstöngli ofan í gel matarlit og setjið rönd upp eftir pokanum af matarlit. Setjið ostamúsina ofan í pokann og sprautið henni í glösin. Skreytið með Candy cane brjóstsykri og rauðum sprinkles eða Jimmy´s.

Kælið ostamúsina í 2 klst. Geymið í kæli þar til ostamúsin er borin fram. Gott er að gera ostamúsina daginn áður.

Höfundur: Thelma Þorbergsdóttir