- +

Steiktur lax á beði af byggotto með snöggpæklaðri agúrku

Lax:
1 kg lax
Salt og pipar
50 g smjör

Byggotto
300 g perlubygg
1 rauður laukur
1 sellerístöng
100 g sveppir
2 hvítlauksrif
1 hvítvínsglas
150 ml rjómi frá Gott í matinn
25 g smjör

Snöggpækluð agúrka:
½ agúrka
2 msk. hvítvínsedik
1 tsk. salt
1 tsk. sykur
Safi úr hálfri sítrónu

Aðferð:

Fyrir fjóra til sex.

 

Byrjið á því að undirbúa agúrkuna þar sem hún þarf um hálftíma til að verða tilbúin. Takið hálfa agúrku og skerið niður í fallega borða (með svokölluðum ,,spiralizer"). Veltið þeim upp úr hvítvínsediki, salti, sykri og ferskum sítrónusafa.  Látið standa við herbergishita á meðan maturinn er eldaður.

 

Skerið rauðlaukinn, selleríið, sveppina og hvítlaukinn og steikið í um 25 g af smjöri þangað til að það er dásamlega mjúkt og ilmandi. Saltið og piprið.

 

Sjóðið byggið samkvæmt leiðbeiningum í söltuðu vatni. Bætið svo bygginu saman við grænmetið og blandið vandlega saman. Hellið svo glasi af víni saman við - og látið það sjóða niður. Hellið svo rjómanum saman við - hrærið vandlega saman og látið rjómann sjóða niður. 

 

Saltið og piprið laxinn og steikið svo í brúnuðu smjöri. Steikið fyrst með roðið niður þangað til að það er stökkt og snúið svo. Þegar fiskurinn er eldaður í gegn þarf ekkert annað að gera en að bera hann fram!

 

Svo þarf bara að raða þessu upp. Fyrst byggottó - svo laxinn - síðan agúrkan og berið fram með sneið af sítrónu. Fullkomið. 

 

Höfundur: Ragnar Freyr Ingvarsson