- +

Hin fullkomna bröns samloka 'Croque Madame'

Samlokur, innihald:
4 stk. þykkar sneiðar súrdeigsbrauð
Brauðostur, skorinn í sneiðar
silkiskorin skinka
dijon sinnep
2 msk. sultaður rauðlaukur (keyptur tilbúinn eða heimagerður, sjá uppskrift hér að neðan)
mjúkt smjör
2 stk. egg
salt og pipar

Sultaður rauðlaukur, innihald:
2 stk. stórir rauðlaukar
1 tsk. þurrkað timjan
2 msk. smjör
2 msk. púðursykur
2 msk. balsamikedik
salt og pipar

Þessi uppskrifti dugar í tvær samlokur.

Aðferð:

Byrjið á að hita pönnu og steikið eggið upp úr dálitlu smjöri við frekar vægan hita, setjið til hliðar. Smyrjið tvær sneiðar af súrdeigsbrauði með þunnu lagi af Dijon sinnepi. Setjið vænt lag af ostsneiðum á aðra brauðsneiðina og vænt lag af skinku þar ofan á ásamt sultuðum rauðlauk og lokið samlokunni. Smyrjið samlokuna alla að utan með smjöri. Steikið samlokuna á báðum hliðum þar til gullinbrún, toppið samlokuna með osti, stingið pönnunni undir grill í ofni og bakið þar til osturinn er gullinbrúnn. Toppið með spældu eggi. 

Sultaður rauðlaukur, aðferð:

Skerið laukinn í þunnar sneiðar og saxið timían.

Hitið pönnu eða lítinn pott yfir meðalhita og bræðið smjörið. Bætið lauknum á pönnuna ásamt timían, saltið og piprið og steikið þar til laukurinn er orðinn vel mjúkur og hefur minnkað um u.þ.b. helming. Getur tekið um 20 mínútur. Bætið þá balsamikediki og púðursykri á pönnuna og blandið vel saman við laukinn. Leyfið edikinu að sjóða niður í 5 mínútur, gæti þurft að hækka aðeins hitann. Smakkið til með salti, pipar og ediki.

 

Höfundur: Helena Gunnarsdóttir