Brauðbollur og bollukrans
Einfalt
- +

Brauðbollur og bollukrans

Hráefni:
2 dl ylvolgt vatn
2 dl nýmjólk
2½ tsk. þurrger
2 msk. sykur
1 tsk. salt
50 g smjör, brætt
2 stk. egg, annað til penslunar
8 dl hveiti (um 8-10 dl)

Aðferð:

1. Hrærið mjólk og vatn saman í skál. Setjið þurrger saman við. Hrærið þar til freyðir. Látið þá sykur, salt, 1 egg og brætt smjör (passa að það sé ekki of heitt) út í. Hrærið.

2. Setjið hveitið saman við smátt og smátt. Hrærið og hnoðið þar til þið hafið óklístrað deig. Þið gætuð þurft minna eða meira hveiti. Hnoðið í stutta stund. Leggið deigið aftur í skálina og breiðið hreint þvottastykki yfir og látið hefast á hlýjum stað í 40 mínútur.

3. Skiptið deiginu í 22 bita og mótið kúlur/bollur.

4. Klæðið bökunarplötu með bökunarpappír og setjið hringlaga eldfast mót í miðjuna. Gott er að mótið sé u.þ.b. 8-10 cm í þvermál. Raðið átta bollum í kringum mótið. Passið að þær snerti hvorki mótið né hver aðra. Raðið restinni af bollunum fyrir aftan þessar átta og gætið þess að þær komi ekki við hver aðra. Látið hefast í 20 mínútur. Penslið með þeyttu eggi og bakið í 15-20 mínútur við 200°. 

Gott að bera fram með kjötbollum í ostasósu.

Höfundur: Erna Sverrisdóttir