Theodóra J. Sigurðard. Blöndal
Saffranbollur með marsípanfyllingu
12. desember 2017

Saffranbollur með marsípanfyllingu

Saffran er spennandi krydd sem notað er víða bæði í matreiðslu og í bakstur. Þetta er dýrasta krydd sem til er en það þarf aðeins nokkra þræði í matargerð eða um hálft gram í bakstur. Hið gula fallega saffran og ilmurinn frá því er afskaplega jólalegt og  hjá mér hefst einmitt aðventan með því að baka saffranbollur. Í þetta sinn vil ég deila með ykkur uppskrift af fylltum saffransbollum en með því að búa til tvöfaldan skammt af deiginu (sem ég mæli mjög mikið með) er einnig hægt að fá góðan skammt af hefðbundnum saffransnúningum.

Fyllingin í bollunum er blanda af marsípan, smjöri og kardemommufræum og passar afskaplega vel við saffranbragðið í bollunum.

Það hentar vel að frysta bollurnar og snúninganna eftir að þeir hafa kólnað.  Þá eru þessar dásemdir til allan desember. Svo er bara að ná í poka úr frystinum þegar gestir koma og hita í ofninum við lágan hita.

Saffranbollur með marsípanfyllingu

150 g smjör

5 dl mjólk

3 tsk. þurrger

1 ½ dl sykur

½ tsk salt

1 egg

½ g saffran

12-14 dl hveiti

Fylling

150 g marsípan

70 g smjör

6-8 kardemommukjarnar, fræin notuð

Til að skreyta bollurnar með

1 egg, möndluflögur og perlusykur

 

Ofnhiti: 225 °C

Tími: 8-12 mínútur

 

Bræðið smjörið og hellið mjólkinni saman við. Látið vökvann hitna smám saman og ná rúmlega 38-40°C. Það er gott að slökkva á hitanum undir pottinum eða hafa það stillt á lágum hita. Ég sting litla fingur ofan í og finn þannig hversu passlegt hitastigið er. Það á ekki að vera brennandi heitt.

Setjið matskeið af sykur í mortel og bætið saffrankryddinu saman við. Myljið saman þar til saffran- þræðirnir eru nokkurn veginn orðnir að dufti. Það er allt í lagi þótt þeir séu enn til staðar nokkrir af þeim.

Hellið 3 msk. af áfengi t.d Grand mariner, cognac eða sherry saman við saffranblönduna og látið kryddið og sykurinn leysast upp í því. Það er alveg hægt að sleppa þessu og setja saffranið beint út í vökvann. Hellið saffransblandinu saman við mjólkurvökvann og þeytið egginu saman við.

Mælið um 10 dl af hveiti í skál og blandið hinum þurrefnunum saman við  þ.e. þurrgerið, sykurinn og saltið.

Hrærið öllum vökvanum út í þurrefnunum og hrærið vel í. Það þarf að bæta meiri hveiti við og er það gert þar til deigið sleppur vel frá hliðum skálarinnar og er orðið þétt í sér og þægilegt í viðkomu.

Látið deigið hefast á hlýjum stað þar til tvöfalt að stærð og búið til fyllinguna á meðan.

Fylling - Mjúkt smjör og marsípan er blandað saman við kardemommufræin í bragðgóða blöndu.

Þegar deigið er búið að hefast er það hnoðað vel saman og síðan skorið í minni bita. Gott er að skera það í rúmlega 25 – 20 bita.

Hver biti er rúllaður í bollu. Í miðju bollunnar er gert lítið gat með því að teygja aðeins á bollunni. Í gatinu er sett rúmlega tsk. af marsípanfyllingunni og bollunni er svo lokað með því að klípa endana saman.

Setjið bolluna í pappírsform og látið þessa hlið snúa niður. Látið bollurnar hefast í rúmlega 30-40 mínútur. Núna er gott að byrja hita ofninn.

Ef þið ætlið að búa til snúninga þá er deigið skorið i bita og hver biti er rúllaður í mjóa lengju sem er um 20 cm á lengd. Haldið í sitt hvorn endann og rúllið endunum upp á móti hvert annað þannig að snúningurinn verði eins og ,,s“ í laginu. Leggið s:ið á plötu með bökunarpapppir. Raðið snúningum á plötuna og látið þá hefast þar til þeir eru tvöfaldir á stærð.

Þegar bollur og snúningar eru búnir að hefast eru þeir penslaðir með eggi sem slegið hefur verið saman með gaffli. Stráið perlusykur og möndluflögum yfir.

Bakið bollurnar í miðju ofnsins í rúmlega 8 – 12 mínútur (fer eftir ofnum) eða þar til kominn er fallegur gylltur litur á þær.

 

Verði ykkur að góðu! Gleðilega hátið!

Matarást, 

Viltu fylgjast með þessum bloggara?

Skráðu þig til að fá nýjustu færslurnar sendar!