Thelma Þorbergsdóttir
Tælensk súpa með risarækjum
09. október 2019

Tælensk súpa með risarækjum

Tælensk súpa með risarækjum

Fyrir 4-6

Innihald

1 dl hrísgrjón soðin í 2 dl af vatni

3 msk. smjör

400 g risarækjur

Salt og pipar

3 hvítlauksgeirar

1 laukur

1 rauð paprika

2 cm ferskt engifer

3-4 tsk. rautt karrý paste

1 tsk. karrý

400 ml af kókosmjólk í dós

3 dl matreiðslurjómi frá Gott í matinn

1 lítri vatn

2 grænmetisteningar

Safi úr einni límónu

4 msk. koríander

 

Aðferð

  1. Byrjið á því að sjóða hrísgrjónin í 2 dl af vatni. Gott er að slökkva undir hrísgrjónunum þegar vatnið er alveg að verða búið og setja lokið á pottinn, þannig klárast þau að eldast í gufunni.
  2. Setjið smjör á pönnu, setjið rækjurnar á pönnuna ásamt salti og pipar og steikið þar til þær eru tilbúnar. Passið ykkur að elda þær ekki of mikið því þá verða þær seigar. Gott er að elda þær í um 3 mínútur á hvorri hlið. Þegar rækjurnar eru full eldaðar setjið þær í skál og geymið þar til súpan er tilbúin. Þeir sem nota eldaðar rækjur þurfa ekki að steikja þær heldur setja þær beint ofan í súpuna.
  3. Skerið lauk, papriku og hvítlauk niður og steikið á pönnunni. Rífið engifer saman við og hrærið saman.
  4. Bætið rauðu karrý og karrý saman við ásamt kókosmjólk og rjóma.
  5. Blandið vatni saman við ásamt grænmetisteningunum og hrærið þar til súpan fer að sjóða. Gott er að leyfa súpunni að sjóða í rúmar 10 mínútur til að leyfa henni þykkna.
  6. Setjið hrísgrjónin saman við ásamt rækjunum og koriander.
  7. Gott að bera fram með brauði.

Viltu fylgjast með þessum bloggara?

Skráðu þig til að fá nýjustu færslurnar sendar!