Thelma Þorbergsdóttir
Sítrónubollakökur með bláberjakremi
01. júní 2018

Sítrónubollakökur með bláberjakremi

Ég er búin að bíða allan maí, svona eins og flestir, eftir sólinni! Ég ætlaði nefnilega að bjóða vinnufélögum mínum í ljúffengan hádegismat á pallinn hjá mér og fá smá sól með því. Aldrei kom sólin, svo ég ákvað að ekki væri hægt að bíða eftir henni lengur. Mig langaði að gera eftirrétt handa þeim sem væri sumarlegur og ferskur og ákvað því að skella í ljúffengar sítrónubollakökur með bláberjakremi og ferskum bláberjum. Þær slógu heldur betur í gegn á meðal vinnufélaganna og sú gula kíkti meira að segja við þegar ég bar þær á borð. Nú þýðir ekkert annað en að vera jákvæð í garð veðurguðanna og vonast til þess að fá smá meiri sól í líf okkar hér á Íslandi í júní.

Mæli með þessum bollakökum í hvaða boði sem er. Snilld að bjóða upp á eina svona köku sem eftirrétt með grillinu í sumar….eða jafnvel fleiri! Njótið.

Sítrónubollakökur með bláberjakremi

12-15 bollakökur

Innihald:

115 g smjör við stofuhita
200 g sykur
2 stk. egg
2 tsk. vanilludropar
190 g hveiti
2 tsk. lyftiduft
¼ tsk. salt
120 ml mjólk
2 stk. sítrónur, börkur og safi

Bláberjakrem

230 g bláber, frosin eða fersk

3 msk. safi úr sítrónu

250 g smjör, við stofuhita

500 g flórsykur

2 msk. rjómi frá Gott í matinn

Aðferð

Gott er að byrja á því að gera bláberjablönduna sem fer í kremið (sjá aðferð að neðan).

Hitið ofninn í 180 gráður og raðið bollakökuformum ofan í bökunarform og setjið á ofnplötu. Hrærið smjör og sykur saman þar til blandan verður ljós og létt. Bætið eggjum saman við einu í senn og hrærið vel á milli ásamt vanilludropum. Blandið hveiti, lyftidufti og salti saman í skál og bætið saman við deigið smátt og smátt í einu ásamt mjólkinni. Setjið því næst börkinn af sítrónunum ásamt safanum saman við og hrærið þar til allt hefur blandast vel saman. Sprautið deiginu í bollakökuformin og passið að fylla þau ekki meira en 2/3 eða um 2 msk. í hvert form. Bakið í 18-20 mínútur eða þar til tannstöngull kemur hreinn upp úr miðju kökunnar. Kælið kökurnar alveg áður en þið setjið krem á þær.

 

Bláberjakrem

Setjið berin í pott ásamt sítrónusafanum. Ef þið notið frosin ber eru þau sett beint í pottinn, ekki þarf að afþýða þau. Hitið bláberin við meðalháan hita og hrærið þar til bláberin hafa myndað mauk sem hefur þykknað. Gott er stappa aðeins bláberin eða kremja þau með sleif. Sigtið bláberin í skál svo hýðið og annað verði eftir. Setjið skálina í kæli.

Hrærið smjör þar til það verður ljóst og létt. Bætið flórsykri saman við smátt og smátt í einu og hrærið vel á milli. Gott er að skafa hliðarnar af skálinni á milli. Setjið rjóma saman við og hrærið vel. Þegar bláberjablandan hefur náð stofuhita er henni blandað saman við kremið, skiljið þó eftir rúmlega 3 msk. af bláberjablöndunni til að skreyta kökurnar með. Hrærið þar til kremið hefur fengið fallegan fjólubláan lit og allt hefur blandast vel saman. Sprautið kreminu fallega á hverja köku fyrir sig, ég notaði stút 1M frá Wilton. Skreytið með ferskjum bláberjum og restinni af bláberjablöndunni. Ef bláberjablandan hefur þykknað of mikið til þess að hægt sé að skreyta með henni, blandi þið einfaldlega aðeins meiri sítrónusafa saman við og hrærið.

Verði ykkur að góðu

Thelma

www.freistingarthelmu.blogspot.com

 

Viltu fylgjast með þessum bloggara?

Skráðu þig til að fá nýjustu færslurnar sendar!