Ragnar Freyr Ingvarsson
Ofnbakaðar kartöflur með Óðals Tindi
16. nóvember 2018

Ofnbakaðar kartöflur með Óðals Tindi

Það er morgunljóst að kartöflur og ostur passa ótrúlega vel saman (reyndar passa kartöflur líka rosalega vel með rjóma og smjöri). Nýverið kom frétt á vegginn minn á Facebook að það væri verið að setja á markað nýjan íslenskan ost. Kannski ekki alveg nýjan - um er að ræða ostinn Óðals Gull Tind, sem er Óðalsostur sem fær að þroskast í 12 mánuði, umlukinn svörtu vaxi. Með því að láta ostinn þroskast lengur dýpkar bragðið heilmikið og tekur á sig annan tón. 

Mér finnst sérstaklega gaman að nota svona osta í matargerð. Ég komst á bragðið með þetta þegar ég bjó í Svíþjóð. Þar kynntist ég osti - Västerbotten - sem mér finnst mjög ljúffengur og finnst gott að nota, t.d. í gratín. Hann fær einmitt að þroskast í nokkra mánuði eins og Óðals Tindur - sem er líka þeim kostum gæddur að bráðna vel. 

Faðir minn á heiðurinn af þessari uppskrift - en hann er mikill kartöflu unnandi, eiginlega sama hvernig þær eru eldaðar. En þegar maður veltir þeim upp úr hvítlauksolíu og osti - þá er maður að miða á stjörnurnar. 

 

Ljúffengir ofnbakaðir kartöflustaflar með hvítlauksolíu og 12 mánaða svörtum Tindi úr Skagafirði

Fyrir sex 

 

500 g kartöflur

6 msk. hvítlauksolía

200 g svartur Óðals Gull Tindur 12 + (eða Óðals Tindur, Óðals Búri eða t.d. Óðals Cheddar)

Salt og pipar

Timjan til skrauts. 

 

Þetta er auðvitað sára einföld uppskrift - en það er oft þannig - einfalt og sérlega ljúffengt. 

Ostinn nálgaðist ég í Ostabúðinni á Skólavörðustígnum. En mér skilst að hann komi ekki í almenna sölu fyrir en eftir áramótin. Fram að þeim tíma má að sjálfsögðu nota venjulegan Óðals Tind - hann gefur þessum ekkert eftir þó svo hinn svarti hafi aðeins dýpri karakter. Þá má að sjálfsögðu líka prófa Óðals Búra eða Óðals Cheddar. Það myndi án efa slá í gegn þar sem allir þessir ostar eiga það sameiginlegt að bráðna vel! 

Skerið kartöflurnar niður heldur þunnt. Auðvitað má gera það með mandólíni - en það breytir í raun ekki miklu. 

Kartöflunum er svo velt upp úr hvítlauksolíu. Saltað og piprað.

Svo er það aðalleikarinn. Þetta er fantagóður ostur - bragðmikill en mjúkur á bragðið. 

Svo er bara setja fallega svuntu á föður sinn og fá hann til að saxa ostinn í smáa bita. 

Svo er bara að raða upp kartöfluskífunum upp, gæta sín að dreifa ostinum á milli laga. 

Aðalmálið er að láta kartöflustaflana halda jafnvægi. Skreyta með timjan.

Svo er bara að baka kartöflurnar í þrjú kortér við 180 gráðu hita.

Svo er lítið að annað að gera en að gæða sér á þessu sælgæti! 

Viltu fylgjast með þessum bloggara?

Skráðu þig til að fá nýjustu færslurnar sendar!