Halla Bára og Gunnar
Hamborgari með piparostafyllingu
16. júní 2015

Hamborgari með piparostafyllingu

Uppskrift að hamborgara með piparostafyllingu sem birtist í sjónvarpsauglýsingu fyrir MS. Algjör lúxusborgari sem vert er að eyða tíma í sem og njóta. Piparosturinn gefur mjúkt, kremkennt og kryddað bragð í borgarann sem er gott á móti sætu og söltu í lauknum og beikoninu.

Hamborgari með piparostafyllingu

4-6 stk.

 

Hamborgarar:

500 g vandað nautahakk

3 msk steinselja, söxuð

3 msk brauðmylsna

Piparostur, skorinn í litla teninga, 5-8 teningar í hvern borgara

1 msk dijon hunangssinnep

1 egg

sjávarsalt og svartur pipar

 

Piparostur, skorinn í þunnar sneiðar

Stökksteikt beikon, smátt saxað

 

Majones

Stór og rauður tómatur, skorinn í vænar sneiðar

Ferskt og brakandi salat, ekki iceberg, meira grænt

Rauðlaukur í þunnum sneiðum

Súrar gúrkur, heilar, litlar skornar í sneiðar endilangt

 

Vönduð hamborgarabrauð

 

Hrærið allt hráefnið saman í hamborgarana. Mótið hamborgara í þeirri stærð sem þið kjósið og geymið í ísskáp í a.m.k. klukkustund áður en þeir eru steiktir eða grillaðir.

Steikið borgarana á pönnu, eða grillið, þar til þeir hafa lokað sér vel. Leggið á þá  sneiðar af  piparosti og smátt söxuðu beikoni. Stingið borgurunum í heitan ofn í nokkrar mínútur, eða þar til osturinn ofan á er mjúkur og passlega bráðinn og borgarinn eldaður að smekk hvers og eins.

 

Rauðlaukur í ediki - meðlæti:

1 rauðlaukur, sneiddur örþunnt

1 msk hvítvíns- eða rauðvínsedik

1 tsk sykur

1 tsk salt

 

Hrærið allt hráefnið saman og látið standa í a.m.k. klukkustund áður en laukurinn er settur á hamborgarann. Rauðlaukinn má líka bera fram á borgaranum án þess að fara þessa leiðina en hún skemmir ekki!

 

Samsetning:

Smyrjið brauðin með vönduðu majónesi. Leggið salatblað á neðra brauðið og væna tómatsneið ofan á, þá borgarann. Ofan á borgarann fer rauðlaukurinn, ofan á hann fara gúrkurnar og þá efra brauðið.

Viltu fylgjast með þessum bloggara?

Skráðu þig til að fá nýjustu færslurnar sendar!