Hafdís Priscilla Magnúsdóttir
Kladdkaka með kókosbotni
27. júlí 2018

Kladdkaka með kókosbotni

Stundum þá er bara súkkulaðikaka ekki nóg. Stundum þarf bara að bæta smá “tvisti” við uppskriftina og gera eitthvað nýtt. Það er það sem gerðist hér. Kladdkökubotninn minn sem ég geri reglulega þurfti eitthvað nýtt í þetta skipti og úr varð þessi kladdkaka með kókosbotni ofan á.  Kökuna er mjög auðvelt að útbúa og ef fólk er ekki að fylgja sykurlausa lífstílnum er minnsta mál að nota venjulegt súkkulaði og skipta út Sukrin Melis fyrir flórsykur eða venjulegan sykur.

Kladdkökubotn:


100 g smjör

100 g sykurlaust súkkulaði

2 egg

1 dl rjómi frá Gott í matinn

4 msk. sukrin melis

1-2 msk. kakó

1 tsk. vanilludropar

 

Smjör og súkkulaði er sett í pott og brætt. Rjóma bætt við og blandað vel. Egg og sukrin þeytt vel saman og blandað svo við súkkulaðið. Vanilludropum bætt við. Í restina er kakói bætt við. Best að smakka hversu mikið maður vill.

Setjið deigið í 22 cm sílikon- eða springform.

Ofninn stilltur á 200 gráður og kakan bökuð í 10-12 mínútur. Hún á að vera blaut í miðjunni.

 

Kókosbotn:

80 ml kókosolía

100 ml kókosmjólk

110 g sukrin melis 

250 g kókosmjöl

 

Kókosolía og kókosmjólk eru hitaðar í potti. Takið af hellu þegar vel blandað saman. Bætið út í sukrin melis og kókos og blandið vel.

Setjið yfir kladdkökubotninn og þjappið smá til að binda saman botninn.

Setjið kökuna í frystinn í um klukkustund til að auðvelda það að taka hana úr forminu.

Bræðið 100 g af sykurlausu súkkulaði og 100 ml af rjóma í potti. Kælið smá og setjið svo yfir kökuna og skreytið með kókosmjöli. Ekki verra að bera kökuna fram með þeyttum rjóma og mjólkurglasi :)

Viltu fylgjast með þessum bloggara?

Skráðu þig til að fá nýjustu færslurnar sendar!