- +

Fermingarterta með jarðarberjabragði

Svampbotn (2 stk.):
6 stk. egg
260 g sykur
100 g hveiti
100 g kartöflumjöl
2 tsk. lyftiduft

Fylling:
1½ l rjómi frá Gott í matinn
1 pakki Jello jarðarberja
10 stk. makkarónur
1 dós blandaðir ávextir

Sykurmassi:
350 g sykurpúðar
950 g flórsykur
5 msk. vatn
Matarlitur

Aðferð:

Egg og sykur þeytt vel saman þar til létt og ljóst.

Hveiti, kartöflumjöli og lyftidufti blandað varlega saman við. 

Deiginu hellt í tvö hringlaga mót. 

Bakað við 175 gráða hita í 18-20 mínútur. 

Þegar botnarnir hafa kólnað er rjóminn þeyttur. Rjómanum er síðan skipt í 3 hluta. 

Blandaðir ávextir eru settir yfir neðri botninn og makkarónurnar muldar yfir. 

1 hlutinn af rjómanum er smurður yfir. 

Síðan er Jello dufti blandað saman við 2 hluta af rjómanum. Hrært varlega saman við með sleikju. Þá er jarðarberjarjómanum smurt yfir. 

 

Sykurmassi:

Sykurpúðarnir eru settir í glerskál sem smurð er með palmínfeiti ásamt vatninu. Sykurpúðarnir eru síðan hitaðir í örbylgjuofni þar til þeir hafa bráðnað. Nauðsynlegt að hræra í þeim á mínútufresti. Flórsykrinum er þá blandað saman við, fyrst helmingnum og síðan restinni. Massinn er hnoðaður og geymdur í plastpoka þar til hann er flattur út. Ef lita á ákveðinn hluta massans þá er matarlit blandað saman við og hnoðað vel. 

 

Efri botninn er settur yfir og kakan smurð með 3ja hlutanum af rjómanum.

Sykurmassinn er flattur út. Það kemur skemmtilega út að fletja massann út á munsturmottu en einnig hægt að fletja út á hefðbundinni mottu.

Kakan er að lokum skreytt með perluborða, fiðrildum og blómum. Notuð eru sílíkonmót til að búa til skreytingarnar.

Höfundur: Hjördís Dögg Grímarsdóttir