- +

Bruschetta með fetaostakremi, salami og hægelduðum tómötum

Bruschetta
súrdeigsbrauð eða annað gott brauð
ólífuolía, gæðaolía
hálft hvítlauksrif

Tómatar
kirsuberjatómatar, skornir í tvennt
ólífuolía
salt og pipar
örlítill sykur að eigin vali
ferskar kryddjurtir að eigin vali, fallegt að nota ferskt óreganó

Fetaostakrem
fetaostur í krukku með tómötum og ólífum, eða í kryddolíu
sítrónubörkur og -safi úr hálfri sítrónu
hálft hvítlauksrif
ólífuolía

Álegg
klettasalat
salamipylsa
parmesanostur
salt og pipar

Aðferð:

Byrjið á því að útbúa tómatana. Hitið ofn í 120-150 gráður. Hitinn á ofninum verður af ráðast af því hve langan tíma þið hafið til að leyfa tómötunum að vera í ofninum. Best er að gefa þeim góðan tíma og láta þá hægeldast í allt að 2-3 klukkustundir og þá á 120 gráðum. Athugið að það sleppur auðveldlega að hafa ofninn á 170 gráðum og fylgjast vel með tómötunum í klukkutíma ef ekki er lengri tími fyrir hendi.

Skerið tómatana í tvennt, leggið í ofnfast mót. Dreypið vel yfir þá af góðri ólífuolíu, saltið og piprið og stráið örlitlum sykri yfir að eigin vali. Leggið kryddjurtir yfir tómatana. Stingið í ofn. Kíkið reglulega á þá. Kryddjurtirnar brenna auðveldlega ef ofninn er of heitur. Best er að gefa tómötunum góðan tíma í ofninum. Þeir eru góðir heitir sem kaldir.

Fetaostakrem – allt hráefnið hrært og stappað saman í skál, smurt á brauðið, frekar þykkt.

Skerið brauðið í sneiðar. Stingið undir grill, í heitan ofn eða setjið á grillpönnu. Alls ekki láta brauðið verða hart! Að þessu loknu er hálfu hvítlauksrifi nuddað ofan í brauðsneiðarnar og ólífuolíu dreypt yfir það.

Leggið brauðsneið á disk, smyrjið með fetaostakremi, leggið svo tvær salamisneiðar ofan á, salat, þá tómata og rifinn parmesanost. Berið fram og borðið!

Höfundur: Halla Bára Gestsdóttir