Menu

Þorskhnakkar í rauðum hafrahjúp með tómat- og rjómaostasósu

Einfaldur, mjög bragðgóður og fallegur fiskréttur með fáum hráefnum sem oftast eru til heima.

Ef ekkert tandoori krydd laumast í skápnum er minnsta mál að nota aðeins paprikuna með t.d. nokkrum chili flögum bættum saman við.

Skemmtilegt er að búa til sitt eigið rasp og nota t.d. haframjöl eins og í þessari uppskrift til að steikja fiskinn upp úr. Það má á margan hátt búa til sitt eigið rasp. Spennandi kostir eru  kókos, kornflakes, ritzkex, special k og múslí afgangar og blanda þeim saman við kryddum eftir smekk.

Innihald

4 skammtar
þorskhnakkar (um 6 stk.)

Rasp:

haframjöl (3-4 dl)
salt
svartur pipar
paprika, mulin
tandoori, indversk blanda
egg til að velta fisknum upp úr

Tómat- og rjómaostasósa

laukar
tómatsósa
vatn (1/2 - 1 dl)
smjör (100 - 125 g)
rjómaostur frá Gott í matinn (eða meira eftir smekk)

Meðlæti:

Soðnar og ristaðar kartöflur og salatblanda

Sósa

  • Skerið laukinn, ýmist í sneiðar eða í litla bita. Allt eftir hentisemi.
  • Bræðið smjörið og setjið laukinn saman við. Lækkið hitann og látið laukinn malla í smjörinu, t.d. á meðan verið er að búa til raspið.
  • Látið laukinn mýkjast vel í smjörinu (8 - 12 mínútur).
  • Setjið tómatsósuna og vatnið saman við lauksmjörið og hrærið. Það má alveg setja ögn af pipar saman við þessa sósu ef þannig liggur á manni.
  • Setjið rjómaostinn saman við, látið hann bráðna í sósunni og smakkið til.

Rasp

  • Setjið haframjölið í blandara og myljið það rétt aðeins til þess að fá það fínmalað í bland við grófmalað.
  • Blandið kryddi saman við.

Fiskur

  • Hitið smjör eða olíu (eða bæði) á pönnu.
  • Veltið fiskbitunum upp úr eggi og síðan upp úr raspinu.
  • Setjið fiskbitana á heita pönnu og steikið þá nokkrar mínútur á hvorri hlið. Lækkið hitann aðeins. Gott er að geyma bitana sem búið er að steikja í heitum ofni á meðan allir fiskbitar eru steiktir. Þannig að allt helst heitt.

Kartöflur

  • Eftir að kartöflurnar eru soðnar eru þær skornar tvennt, settar í eldfast mót, stappaðar rétt aðeins með gaffli, og smjörklípa sett yfir.
  • Stingið þeim inn í ofn og látið þær ristast á meðan þið klárið að útbúa matinn.
  • Berið fram með fallegu grænu salati.

Höfundur: Theodóra J. Sigurðardóttir Blöndal