Sjávarréttasúpa og hvítlauksbrauð
Einfalt
- +

Sjávarréttasúpa og hvítlauksbrauð

Innihald:
700 g þorskur, skorinn í bita (munnbitastærð)
200 g lax, skorinn í bita (munnbitastærð)
300 g risarækjur/humar/hörpuskel
500 g minni rækjur (soðnar)
1 stk. laukur, saxaður smátt
3 stk. hvítlauksrif (pressuð)
1 stk. rauð paprika skorin í strimla
1 stk. gul paprika skorin í strimla
4 stk. gulrætur skornar í strimla
1 stk. blaðlaukur, skorinn smátt
1 dós tómatpúrra
½ l vatn
1 dós kókosmjólk
1 dós niðursoðnir tómatar í bitum
½ l rjómi frá Gott í matinn
1 msk. fiskikraftur
1 msk. ferskt rósmarín (saxað smátt)
Karrí eftir smekk
Salt og pipar
Hvítlauksduft
Cayenne pipar
Ólífuolía

Hvítlauksbrauð
1 baguette brauð skorið skáhallt í sneiðar
Smjör
½ poki rifinn Mozzarella
Hvítlauksduft
Salt og pipar

Aðferð:

Þessi uppskrift dugar fyrir 6-8 manns. Eins má gera hana fyrir minni hóp ef ætlunin er að eiga afgang daginn eftir sem er svo sannarlega ekki leiðinlegt.

Sjávarréttasúpa:

Steikið lauk, hvítlauk og vel af karrý upp úr ólífuolíu stutta stund.

Bætið þá paprikum og gulrótum saman við og kryddið með salti, pipar, hvítlauksdufti og smá Cheyenne pipar.

Því næst fer blaðlaukurinn saman við og hrært stutta stund.

Tómatpúrrunni er þá blandað saman við grænmetið ásamt vatninu og leyft að blandast.

Þá má bæta kókosmjólkinni, rjómanum og niðursoðnu tómötunum í pottinn.

Þessu er leyft að malla, fiskikrafti bætt saman við ásamt rósmaríni og svo kryddað til eftir smekk með salti, pipar, Cheyenne pipar og hvítlauksdufti.

Náið því næst upp suðunni og bætið fisknum og risarækjunum saman við.

Því næst færi humar/hörpuskel séuð þið smeð slíkt og að lokum minni rækjurnar þar sem þær þurfa örstuttan tíma, bara rétt að hitna. 

 

Hvítlauksbrauð:

Smyrjið vel af smjöri á hverja brauðsneið og raðið á bökunarplötu/bökunarpappír (skerið með ostaskera ef smjörið kalt)

Kryddið með hvítlauksdufti og smá salti.

Stráið Mozzarella osti yfir hverja sneið og kryddið yfir allt með pipar.

Bakið í ofni við 200°C þar til hæfilega stökkt (nokkrar mínútur).

Höfundur: Berglind Hreiðarsdóttir