- +

Tagliatelle með rækjum og tvennskonar tómötum

Hráefni
300 g kirsuberja- eða kokteiltómatar, skornir í tvennt
½ msk ólífuolía
½ tsk þurrkað óreganó
sjávarsalt og svartur pipar
⅛ tsk sykur
500 g tagliatelle pasta
500 g stórar rækjur eða sama magn af humri
3 stk. hvítlauksrif, marin
3 msk smjör
3 stk. skallottulaukar, fínsaxaðir
1¼ dl sólþurrkaðir tómatar, skornir í ræmur
25 g fersk basilíka, gróft söxuð
2 dl þurrt hvítvín
2½ dl vatn og hálfur teningur af kjúklingakrafti, eða 2,5 dl kjúklingasoð
2½ dl matreiðslurjómi
1¼ dl parmesanostur, fínrifinn
svartur pipar
sjávarsalt ef þurfa þykir
sítrónubátar til að kreista yfir þegar rétturinn er tilbúinn

Aðferð:

Skerið kirsuberjatómatana í tvennt og leggið á ofnplötu klædda bökunarpappír. Dreypið ólífuolíu yfir, þá oregano, sykri, salti og pipar. Setjið tómatana í ofninn og bakið í 25 mínútur við 250°C.

Setjið smjör á pönnu ásamt hvítlauk og léttsteikið rækjurnar upp úr hvítlaukssmjörinu. Takið þær síðan af pönnunni og setjið til hliðar. Það er ekki verra að nota humar en rækjur, ykkar er valið.

Þá fara skallottulaukur, sólþurrkaðir tómatar og basilíka á heita pönnuna í eina mínútu og loks allur vökvinn. Látið sjóða niður í 20 mínútur og bætið þá parmesanostinum saman við og látið sjóða áfram í um eina mínútu. Smakkið til með pipar, en það er óþarfi að bæta við salti þar sem parmesanosturinn og soðið sjá um þann part.

Sjóðið að lokum pastað samkvæmt leiðbeiningum á pakkanum, í miklu og vel söltu vatni. Hækkið undir sósunni og setjið rækjurnar og soðið af þeim saman við. Veltið pastanum upp úr herlegheitunum og færið yfir á fat eða í skál. Skreytið með ofnbökuðum tómötum og ferskri basilíku.

Höfundur: Erna Sverrisdóttir