- +

Penne með porcini-sveppum, sítrónu og furuhnetum

Hráefni
400 g penne pasta, soðið skv. leiðbeiningum á pakka
2 msk. smjör
2 stk. hvítlauksrif, fínt sneidd
30 g þurrkaðir porcini-sveppir
1 dl vatn
1 dl hvítvín
2 msk. saxaðar, ferskar kryddjurtir að eigin vali, t.d. steinselja, timían og salvía
½ stk sítróna, safi og fínrifinn börkur
2 dl rjómi, einnig er gott að nota sýrðan rjóma
50 g ristaðar furuhnetur
50 g parmesanostur
salt, svartur pipar eða þurrkaðar chillí-flögur

Aðferð:

Hellið vatni og víni í pott og látið sveppina malla á vægum hita í 20 mínútur. Takið þá úr pottinum, kreistið vökvann úr og geymið hann.

Mýkið hvítlauk í smjöri á pönnu í 3 mínútur. Bætið sveppum saman við og látið mýkjast í 5 mínútur í viðbót. Setjið kryddjurtir á pönnuna.

Hellið 1 dl af sveppavökvanum á pönnuna og látið sjóða niður um 2/3 hluta. Hellið sítrónusafa yfir sveppablönduna, stráið sítrónuberki yfir hana, hellið rjóma yfir eða notið sýrðan rjóma. Hrærið saman. Blandið furuhnetum saman við ásamt parmesanosti. Smakkið til með salti, pipar eða chillí-flögum.

Hellið sósunni yfir soðið pastað, blandið saman og berið fram með parmesanosti. 

Höfundur: Halla Bára Gestsdóttir