- +

Pasta All'Amatriciana

Innihald:
400 g spagettí eða bucatiní ef það fæst
4 msk. góð ólífuolía
130 g pancetta í bitum eða gott beikon skorið í bita, best ef það er frekar þykkt
1 lítill laukur, fínt saxaður
1 rautt chillí, um 1 tsk., fínt saxað (má sleppa)
2 msk. hvítvín
örlítið salt
500 g góðir, rauðir tómatar, skornir í báta eða bita
80 g pecorino, parmesan eða mozzarella kúla

Aðferð:

Setjið lauk, chillí og pancettu/beikon á pönnu ásamt ólífuolíu og mýkið í 4-5 mínútur á miðlungshita. Hellið hvítvíninu á pönnuna, saltið aðeins og setjið tómatana saman við. Látið malla á vægum hita í 20-30 mínútur og hrærið í sósunni annað slagið.

 

Sjóðið pastað skv. leiðbeiningum, saltið vatnið vel (það er tvennt sem við höfum lært undanfarið – að salta pastavatnið mun meira en við erum vön og að sjóða pastað örlítið styttra en við höfum gert. Skiptir öllu máli).

 

Látið renna af pastanu og hrærið sósuna saman við það. Berið fram með nógu miklu af osti og um að gera að prófa að rífa mozzarellakúlu saman við pastað í skálinni/pottinum og láta hann leika um allt.

Höfundur: Halla Bára Gestsdóttir