- +

Kjúklingapasta með sítrónu og spínati

Innihald:
250 g tagliatelle pasta, ferskt
2 stk. kjúklingabringur
2 msk. ólífuolía
4 msk. smjör
½ stk. laukur
1 stk. hvítlaukur
2 msk. sítrónusafi
börkur af hálfri sítrónu
50 g spínat, ferskt
50 g parmesan ostur, rifinn niður
1½ dl matreiðslurjómi
salt, pipar og sítrónupipar

Aðferð:

Þetta pasta er einstaklega ferskt og fljótlegt - það tekur um 20 mínútur að koma því á matarborðið og uppskriftin dugar fyrir 3-4.

Sjóðið pastað eftir leiðbeiningum, gott er að setja smá olíu og salt í pottinn þegar pastað er soðið. Passið ykkur á því að sjóða pastað ekki of mikið.

Skerið kjúklinginn í litla bita og steikið á pönnu ásamt ólífuolíu, kryddið kjúklinginn með salti og pipar. Þegar kjúklingurinn fer að verða tilbúinn skerið þá laukinn smátt niður og blandið honum saman við ásamt hvítlauk, smjöri, sítrónusafa, sítrónuberki og spínati. Steikið þar til kjúklingurinn er tilbúinn og hrærið vel. Blandið pastanu saman við á pönnuna og setjið rifinn parmesan ost yfir ásamt matreiðslurjómanum og hrærið vel. Kryddið að vild, gott er að smakka pastað til og krydda eftir því.

Berið fram með auka parmesan osti og hvítlauksbrauði.

Höfundur: Thelma Þorbergsdóttir