- +

Gæðapasta með piparostasósu, beikoni og grænum baunum

Innihald:
pasta að eigin vali, soðið al dente
1 dl pastasoð
piparostur
2 dl rjómi (2-3 dl)
10 beikonsneiðar (10-12 sneiðar), eldaðar og skornar í bita
3 dl grænar baunir, frosnar úr poka, búið að þýða
rifinn parmesanostur

Aðferð:

Hlutföllin í uppskriftinni eru miðuð við fjóra.

 

Skerið ostinn aðeins niður og bræðið hann í rjómanum á miðlungshita svo úr verði slétt og fín sósa. Eldið beikonið í ofni eða á pönnu, skerið í pena bita. Þýðið baunirnar.

Sjóðið pastað sem þið kjósið að nota, al dente, takið einn desilítra af pastasoðinu og geymið. Látið renna af pastanu en alls ekki láta það þorna, þá missir pastað mýktina og sósan leikur ekki eins vel um það.

Hellið pastanu í skál, fat eða pott. Hellið sósunni yfir það, hrærið hana saman við. Ef hún er ekki nægilega mikil eða þunn þá er gott að hella pastasoðinu yfir og hræra vel. (Við gerum það að vísu nánast alltaf með pastasoðið, og með mjög marga rétti, til að ná góðri áferð á pastasósur). Blandið beikoni og baunum saman við.

Berið strax fram með parmesanosti… og svona til að kóróna réttinn má hafa með honum gott brauð eða hvítlauksbrauð.

Höfundur: Halla Bára Gestsdóttir