- +

Súkkulaðikaka með saltaðri karamellu og súkkulaðikremi (frosting)

Botnar
3¼ dl hveiti
4 dl sykur
2 dl kakó
2 tsk lyftiduft
1 tsk natron
1 tsk salt
2½ dl mjólk eða rjómi
1¼ dl olía, t.d. repju-, hnetu- eða isio-olía
2 stk egg
1 tsk vanilludropar
2½ dl heitt kaffi

Karamella
2½ dl sykur
6 msk vatn
2 msk síróp
8 msk rjómi
4 msk smjör
1 tsk gæðasalt, flögur

Súkkulaðikrem (frosting)
80 g suðusúkkulaði
100 g mjúkt smjör
1 stk eggjarauða
1 tsk vanilludropar
1½ dl flórsykur
½ tsk kaffiduft
1 tsk heitt vatn

Aðferð:

Hitið ofn í 180 gráður. Setjið öll þurrefni í hrærivélarskál, hrærið saman á lægstu stillingu og látið þau blandast vel. Bætið þá mjólk eða rjóma, olíu, eggjum, vanilludropum og kaffi saman við og hrærið vel en varlega því blandan er frekar þunn. Hellið í tvö smurð bökunarform, kakan fer best í 22-23 cm formum því þá ná botnarnir meiri þykkt og kakan er veglegri og reisulegri að bera fram.

Setjið í ofn og bakið í 25-35 mínútur. Stingið í botnana með kökuprjóni eftir 25 mínútur og athugið hvort hann kemur hreinn út. Ef svo er þá eru botnarnir bakaðir. Gætið að því að baka þá ekki of mikið, þá verða þeir þurrari en þeir eiga að vera. Kælið áður en karamellan fer á þá.


Karamella

Setjið sykur, vatn og síróp í pott, hrærið saman. Bræðið saman þar til sykurinn fer að fá á sig gullna áferð. Ekki hræra í blöndunni á meðan. Takið af hitanum og hellið rjóma saman við. Blandan bubblar vel en hrærið vel í á meðan. Hrærið smjöri saman við og þá salti. Kælið í ísskáp áður en karamellan er smurð á neðri botn kökunnar.


Súkkulaðikrem (frosting)

Bræðið súkkulaði og kælið án þess að það taki að harðna. Hrærið það þá saman við mjúkt smjör, í um 3 mínútur. Setjið eggjarauðu saman við og hrærið áfram þar til súkkulaðiblandan er glansandi og kekkjalaus. Bætið vanilludropum og flórsykri út í og hrærið rólega. Látið kaffiduft leysast upp í heitu vatni og hellið varlega saman við kremið. Hrærið áfram þar til kremið er mjúkt og létt.


Karamellan er smurð á neðri botninn, sá efri settur ofan á og kremið smurt á hann. Skreytið með nokkrum saltflögum.

Berið fram með þeyttum rjóma, ís, mascarpone-kremi, grískri jógúrt, ávöxtum, berjum … eða bara eina og sér. Hún stendur fyllilega undir því.


 

Höfundur: Halla Bára Gestsdóttir