Stökkar smákökur með saltaðri karamellu og súkkulaði | gottimatinn.is
- +

Stökkar smákökur með saltaðri karamellu og súkkulaði

Innihald:
140 g hveiti
40 g kakó
¼ tsk. sjávarsalt
80 g smjör við stofuhita
70 g sykur
70 g púðursykur
1 stk. egg
1½ tsk. vanilludropar
2 msk. súrmjólk
50 g saltkringlur
80 g pekanhnetur
1 stk. eggjahvíta

Toppur:
100 g karamellur, t.d. ljósar Freyju karamellur
3 msk. rjómi
sjávarsalt
50 g dökkt súkkulaði

Aðferð:

Hrærið saman smjör, sykur og púðursykur þar til blandan verður ljós og létt. Bætið eggjarauðunni (geymið hvítuna í skál inni í ísskáp), vanilludropum og súrmjólkinni saman við og hrærið. Setjið hveiti, kakó og salt saman í skál og hrærið. Bætið þurrefnunum saman við blönduna smátt og smátt í einu og hrærið á litlum hraða þar til allt hefur blandast vel saman. Passið ykkur að hræra þó ekki of mikið. Myndið stóra kúlu úr deiginu og setjið á disk, setjið plastfilmu yfir deigið og kælið í rúmar 30 mínútur.

Hitið ofninn í 180 gráðu hita. Takið eggjahvítuna úr kæli og hrærið léttilega með gaffli. Saxið pekanhnetur og saltkringlur smátt niður og setjið í skál. Búið til kúlur úr deiginu, um 20 g hver. Setjið hverja kúlu ofan í eggjahvítuna og látið leka vel af, rúllið henni svo upp úr pekanhnetublöndunni. Setjið kökurnar á bökunarplötu með smjörpappír og búið til holu í miðju kökunnar. Bakið í 10 mínútur. Þegar þið takið kökurnar út þarf að þrýsta aftur ofan í miðjuna á hverri köku með skeið svo að holan verði enn til staðar fyrir karamelluna.  Látið kökurnar kólna alveg áður en þið setjið karamelluna ofan á.

Setjið karamellur og rjóma í skál og bræðið í örbylgjuofni. Gott er að hita þær í um 30 sek. í einu og hræra svo inn á milli. Þegar karamellurnar hafa bráðnað er gott að hræra vel og setja svo rúmlega eina tsk. af karamellu ofan á hverja köku, eða þar til holan fyllist. Setjið sjávarsalt ofan á karamelluna. Bræðið súkkulaði yfir vatnsbaði eða inni í örbylgjuofni og sprautið fallega ofan á kökurnar. Látið kökurnar bíða aðeins áður en þið setjið þær í box svo karamellan leki ekki. 

Höfundur: Thelma Þorbergsdóttir