- +

Kókosmarengs með bláberjum

Kókosmarengs:
4 stk eggjahvítur
280 g sykur
½ tsk lyftiduft
100 g kókos

Bláberjasósa:
300 g bláber, best er að nota fersk ber
2 msk vatn
3 msk sykur

Rjómi:
½ l rjómi
50 g kókos
börkur af einni límónu
2 msk flórsykur

Aðferð:

Kókosmarengs:

Stillið ofninn í 150 gráðu hita og setjið bökunarpappír á tvær bökunarplötur og myndið tvo jafnstóra hringi á sitthvora plötuna. Þeytið eggjahvíturnar í hrærivél og blandið sykrinum rólega saman við. Þeytið þar til marengsinn er orðinn stífur og stendur. Setjið lyftiduftið saman við og hrærið vel. Blandið kókósnum saman við með sleif og setjið marengsinn á bökunarplöturnar. Bakið í rúmar 50 mínútur eða þar til marengsinn er alveg þurr viðkomu. Kælið marengsbotnana alveg áður en þið setjið á þá.

 

Bláberjasósa:

Setjið allt saman í pott og sjóðið yfir meðalháum hita, þegar berin eru farin að sjóða látið þau þá malla í rúmar 10 mínútur. Lækkið svo hitann og sjóðið í aðrar 5 mínútur á lágum hita. Gott er að láta berjasósuna standa í dágóða stund til að hún þykkni. Bláberjasósan verður að vera búin að kælast alveg áður en þið setjið hana á kökuna. Gott er að kæla sósuna inni í ísskáp. 

 

Rjómi og samsetning:

Þeytið rjómann þar til hann stendur en passið ykkur þó að þeyta hann ekki of mikið. Oft er gott að þeyta rjómann ekki alveg. Blandið kókós, sítrónuberki og flórsykri saman við með sleif og hrærið þar til allt hefur náð að blandast saman.

Setjið marengsbotn á disk og setjið bláberjasósu ofan á, setjið síðan rjóma og hinn botninn ofan á. Þá setjið þið aftur bláberjasósu á botninn og rjóma ofan á. Skreytið með ferskum bláberjum og sigtið flórsykri yfir þau. Geymið kökuna í kæli þar til hún er borin fram. 

 

 

Höfundur: Thelma Þorbergsdóttir