- +

Kanilsnúðar með karamellu og pekanhnetum

Kanilsnúðar:
1 pk. þurrger
¾ bolli mjólk
¼ bolli sykur
¼ bolli volgt vatn
1 tsk. vanilludropar
1 stk. egg
1 tsk. salt
¼ bolli brætt smjör
3½ bolli hveiti
¼ bolli bráðið smjör til að pensla í lokin

Kanilfylling:
100 g mjúkt smjör
1 bolli sykur
2 msk. kanill

Karamellusósa:
1 bolli púðursykur
4 msk. smjör
1 tsk. vanilludropar
½ tsk. salt
1 msk. mjólk
80 g pekanhnetur

Uppskrift fyrir 8-10 manns.

Ofninn er hitaður í 180 gráður, þegar deigið er tilbúið

 

Aðferð:

Volgt vatnið og þurrger er sett í glas og látið bíða í nokkrar mínútur.

Egg, mjólk, bráðið smjör, salt og sykur er sett í hrærivélina og hrært þar til það hefur blandast vel saman (best að nota krókinn, hnoðarann á hrærivélinni).

Næst fer þurrgersblandan og hveitið út í og hnoðað vel.

Takið deigið úr hrærivélinni, gerið úr því kúlu, penslið með olíu og setið í skál með plastfilmu yfir og látið það standa í um eina og hálfa klst. eða þar til það hefur nánast tvöfaldast.

Þegar deigið er tilbúið er smjörpappír lagður á borðið og hveiti dreift yfir. Deigið er sett ofan á og það flatt út í ferhyrning.

Kanilblandan er nú sett ofan á og dreift vel úr henni og svo er deiginu rúllað upp og skorið í jafna bita.

Í eldfast form fer smjörpappír og kanilsnúðunum er raðað í formið og þeir penslaðir með bræddu smjöri.

Inn í ofn í 25 mínútur eða þar til það er kominn brúnleitur gljái á þá.

Á meðan snúðarnir eru inn í ofni er byrjað á karamellunni. Öll hráefnin nema pekanhneturnar eru sett í pott og látið sjóða við vægan hita í um 5 mínútur, það þarf að hræra vel svo karamellan brenni ekki. Pekanhneturnar eru skornar í bita og þeim bætt út í og potturinn tekinn af hellunni.

Þegar snúðarnir er komnir út er karamellan sett yfir og þá eru þeir tilbúnir.

Snúðarnir eru mjög góðir volgir með ís.

 

Höfundur: Gígja S. Guðjónsdóttir