- +

Brownie smákökur með myntu

Innihald:
120 g smjör við stofuhita
100 g dökkur púðursykur
100 g sykur
1 stk. stórt egg
1 tsk. vanilludropar
1 tsk. piparmyntudropar
140 g hveiti
50 g kakó
2 tsk. instant kaffiduft
1 tsk. matarsódi
¼ tsk. sjávarsalt
100 g dökkt súkkulaði

Toppur:
150 g dökkt súkkulaði
4 stk. Candy cane piparmyntustafir eða brjóstsykur

Aðferð:

Einföld uppskrift dugar í u.þ.b. 20 stk.

Hrærið smjör þar til það verður ljóst og létt. Bætið sykri og púðursykri saman við og hrærið vel. Setjið egg, vanilludropa og piparmyntudropa saman við og hrærið þar til allt hefur blandast vel saman. Gott er að skafa innan úr hliðum skálarinnar hér. Blandið hveiti, kakói, kaffi, matarsóda og salti saman í skál og hrærið. Setjið hveitiblönduna saman við smátt og smátt í einu og hrærið þar til allt hefur náð að blandast vel saman, passið ykkur þó að hræra ekki of mikið. Grófsaxið súkkulaði og blandið saman við. Setjið deigið í skál með plastfilmu yfir og kælið í 2 klst. eða yfir nótt. Setjið bökunarpappír á tvær bökunarplötur, myndið jafnstórar kúlur úr deiginu og raðið með jöfnu millibili á plöturnar. Þrýstið örlítið niður á hverja köku með fingrunum. Bakið í 10 mínútur við 170 gráðu hita. Kælið kökurnar alveg áður en þið takið þær af bökunarplötunni þar sem þær þurfa að jafna sig áður en þið dýfið þeim ofan í súkkulaðið.

Toppur

Bræðið súkkulaði yfir vatnsbaði eða lágum hita og dýfið helmingnum af hverri köku ofan í súkkulaðið. Leggið kökuna á bökunarplötuna. Brytjið candy cane piparmyntustafina niður, gott er að nota mortel eða eitthvað sem getur barið stafina í fíngerða bita. Setjið piparmyntustafina ofan á flötinn með súkkulaðinu og látið súkkulaðið storkna. Einstaklega góðar með heitu kakói eða kaffi. 

Höfundur: Thelma Þorbergsdóttir