Trolls afmæliskaka
Miðlungs
- +

Trolls afmæliskaka

Skúffukaka:
4 stk. egg
420 g sykur
320 g hveiti
3 msk. dökkt kakó, frekar kúfaðar
5 tsk. lyftiduft
2 dl mjólk
120 g brætt smjör

Smjörkrem:
250 g smjör við stofuhita
1 pk. flórsykur (500 g)
4 tsk. vanilludropar
2 msk. mjólk (2-4 msk.)

Aðferð:

Þessi uppskrift dugar í eina hefðbundna skúffuköku en í Trolls-afmæliskökuna þarf að tvöfalda uppskriftina og nota tvo 24 cm form og tvö minni. 

Þá þarf jafnframt að fjórfalda uppskriftina að smjörkreminu fyrir Trolls-afmæliskökuna.

Skúffukaka, aðferð:

Hitið ofninn í 180°C og smyrjið ofnskúffu að innan. Þeytið egg og sykur saman þar til blandan verður ljós og létt, eða í u.þ.b. 5 mínútur. Blandið hveiti, kakói og lyftidufti saman í skál og hrærið. Bætið því saman við blönduna ásamt mjólkinni og brædda smjörinu og hrærið þar til allt hefur blandast vel saman. Skafið vel hliðarnar á skálinni inn á milli til þess að allt blandist vel. Hellið deiginu í ofnskúffuna og dreifið því jafnt með sleif. Bakið í 20 mínútur eða þar til tannstöngull kemur hreinn upp úr miðju kökunnar.

Kælið kökuna áður en þið setjið smjörkremið ofan á.
 
Smjörkrem, aðferð:
Hrærið smjörið í hrærivélinni þangað til það er orðið mjúkt og létt. Bætið smá og smá af flórsykrinum saman við og hrærið vel á milli. Bætið því næst vanilludropunum saman við og mjólkinni. Ef ykkur finnst kremið of þykkt bætið þið við mjólk og ef ykkur finnst það of þunnt bætið þá við flórsykri. Mikilvægt er að hræra kremið mjög vel þegar maður ætlar að skreyta kökur því þá losnum við við alla smjörkekkina og kremið fær fallega áferð. Því lengur sem þið hrærið því betra verður kremið. Kremið verður hvítara því lengur sem það er hrært. Svo er um að gera að lita það með öllum regnbogans litum.

Þegar þessi kaka var skreytt var notaður sprautustútur 1M, en það er hægt að nota hann á svo marga vegu. Fyrst er kakan fest saman með smjörkremi, svona grunnlagi, svo er restinni af kreminu skipt í fjóra hluta og kremið litað með gel matarlitum t.d. bleikum, grænum, bláum og gulum matarlit (nauðsynlegt að nota gel liti og þeir fást t.d. í Allt í köku).

Þegar ébúið er að sprauta hliðarnar á kökunni er smjörkreminu blandað saman í einn sprautupoka og restin á kökunni skreytt. Þannig er efri hlut kökunnar einnig skreyttur. Svo þar sem þetta er Trolls kaka er upplagt að vera með þar til gert glimmer sem er blásið á hliðarnar. Síðan er um að gera að skella nokkrum hressum Trolls köllum ofan á kökuna ásamt stjörnuljósi.

 

Höfundur: Thelma Þorbergsdóttir