- +

Baby Ruth kaka

Botn
3 stk eggjahvítur
220 g sykur
100 g salthnetur
100 g ritzkex
½ tsk lyftiduft

Krem
3 stk eggjarauður
70 g flórsykur
100 g dökkt súkkulaði
40 g smjör

Toppur
½ l rjómi
50 g salthnetur, grófsaxaðar
50 g súkkulaðispænir

Aðferð, botn:

Hitið ofninn í 160°C og setjið smjörpappír í 24 cm eldfast smelluform. Þeytið eggjahvíturnar og blandið sykrinum rólega saman við. Þeytið blönduna þar til hún er orðin stíf og stendur. Hakkið niður ritz-kexið í matvinnsluvél eða myljið það niður og blandið saman við salthneturnar og lyftiduftið. Blandið því saman við eggjablönduna og hrærið saman með sleif. Bakið í 25-30 mínútur. Kælið kökuna alveg áður en þið setjið kremið ofan á hana.

Aðferð, krem:

Þeytið eggjarauður og flórsykur saman þar til blandan verður ljós og létt. Bræðið súkkulaði og smjör saman í potti á meðalháum hita. Blandið brædda súkkulaðinu varlega saman við eggjarauðublönduna og hrærið rólega með sleif þar til allt hefur blandast vel saman. Setjið kremið yfir botninn og látið það leka niður hliðarnar.

Aðferð, toppur:

Þeytið rjóma og setjið yfir kökuna. Grófsaxið salthnetur og stráið yfir rjómann ásamt súkkulaðispónum

Höfundur: Thelma Þorbergsdóttir