Mozzarellafylltir hamborgarar með myntu, jarðarberjachutney, jógúrtsósu og sætkartöfluflögum
Miðlungs
- +

Mozzarellafylltir hamborgarar með myntu, jarðarberjachutney, jógúrtsósu og sætkartöfluflögum

Hamborgarar
500 g nautahakk eða lambahakk
3 stk skallottulaukar, fínsaxaðir
2 msk mynta, fínsöxuð
2 msk ítölsk steinselja (eða önnur) fínsöxuð
sjávarsalt og svartur pipar
1 kúla mozzarellaostur, skorin í fjóra jafna bita
8 stk beikonsneiðar (8-12 stk)

Jarðarberjachutney
250 g jarðarber
1 msk hunang
2 tsk balsamikedik
3 msk mynta (3-4 msk), fínsöxuð
svartur pipar, eftir smekk

Jógúrtsósa
2 dl grísk jógúrt
1 dl majónes
2 msk rjómi
4 msk mynta, fínsöxuð
3 msk kóríander, fínsaxað
1 stk vænt hvítlauksrif, marið
sjávarsalt og svartur pipar

Sætkartöfluflögur
600 g sæt kartafla, skorin í örþunnar sneiðar t.d. með mandólíni eða ostaskera
1 msk ólífuolía (rúmlega msk)
1½ tsk sjávarsalt

Meðlæti
4 stk hamborgarabrauð
ferskt salat
tómatar, skornir í sneiðar
1 stk lárpera (avocado), skorin í sneiðar

Aðferð:

Hamborgarar, aðferð:

1. Blandið fyrstu fjóru hráefnunum saman. Saltið og piprið.

2. Myndið með höndunum 8 kúlur. Fletjið þær aðeins út og setjið 1 mozzarellabita í miðjuna á 4 kúlum. Leggið hinar 4 sneiðarnar yfir og lokið vandlega fyrir með því að þrýsta samskeytum saman.

3. Vefjið beikonsneiðunum utan um hamborgarana.

 

Jarðarberjachutney, aðferð:

1. Setjið jarðarberin í skál og hakkið gróflega með gaffli. Bætið hinum hráefnunum saman við og hrærið varlega.

 

Jógúrtsósa, aðferð:

1. Hrærið fyrstu sex hráefnin saman. Smakkið til með salti og pipar.

 

Sætkartöfluflögur, aðferð:

1. Stillið ofninn á blástur og hitið í 210°.

2. Setjið kartöfluflögurnar á tvær ofnplötur klæddar bökunarpappír.

3. Hellið ólífuolíu yfir og sáldrið salti ofan á.

4. Bakið í 20 mínútur.

 

Höfundur: Erna Sverrisdóttir