- +

Grillaður kjúklingur með indverskri hnetusósu

Kjúklingur
1 heill kjúklingur, tekinn í sundur á hryggnum
2 msk. fersk kóríanderlauf
1 rautt chili-aldin, fræhreinsað og fínsaxað

Kryddlögur
fínrifinn börkur af einni sítrónu
4 rauð chili-aldin, fínsöxuð (4-5)
1 laukur, fínsaxaður
½ safi úr sítrónu
125 ml hnetusmjör
1 msk. sterkt karríduft
150 ml hrein jógúrt, Gott í matinn frá MS
4 msk. hreinn rjómaostur, Gott í matinn frá MS

Þessi uppskrift dugar fyrir 4.

Aðferð:
Blandið öllu hráefni í kryddlöginn saman í matvinnsluvél.

Setjið kjúklinginn í plastpoka og þrýstið létt ofan á hann þannig að hann sé vel útflattur. Hellið helmingnum af kryddleginum yfir hann. Geymið hinn helminginn til að bera fram sem sósu með kjúklingnum. Lokið pokanum og veltið kjúklingnum upp úr kryddleginum. Látið standa í kæli í minnst 6 klst. Hitið grillið að meðalhita. Skafið mestallan kryddlöginn af kjúklingnum, leggið hann á grillið og látið innri hliðina snúa niður. Ef kjúklingurinn helst ekki vel útflattur er hægt að setja t.d. þunga steikarpönnu eða þungt lok af potti ofan á hann fyrstu 10-15 mínúturnar.

Grillið kjúklinginn í 50-60 mín. við óbeinan hita og snúið honum á 15 mín. fresti. Berið hann fram með fersku salati, kaldri jógúrtsósu með indversku ívafi, mjúkum naan brauðum, krydduðum hrísgrjónum og kryddleginum sem tekinn var frá. Búið til sósu úr kryddleginum sem tekinn var frá í byrjun, hitið hann upp og bætið svolitlu vatni eða kókosmjólk út í hann. Skreytið kjúklinginn með fersku kóríander og fínsöxuðu chili.

Höfundur: Inga Elsa Bergþórsdóttir