- +

Fljúgandi Jakob - Kjúklingaréttur með chili rjómasósu, bönunum og beikoni

Innihald:
4 kjúklingarbringur (eða einn tilbúinn grillaður kjúklingur)
4 dl matreiðslurjómi frá Gott í matinn
2 dl chili tómatsósa
2 msk. bbq sósa (2-3 msk.)
2 msk. tómatsósa (2-3 msk.)
4 bananar
150 g smátt skorið beikon (notið gjarnan tilbúið í teningum, steikt)
2 dl rifinn mozzarellaostur frá Gott í matinn (eða magn eftir smekk)
Salthnetur eftir smekk
Salt, svartur pipar og óreganó eftir smekk
1-2 kvistar spergilkál, aðeins blómin notuð

Aðferð:

Ofnhiti 180 °C

Stillið ofnhitann.

 

Skerið kjúklingabringurnar í 2-3 bita. Brúnið bringurnar á pönnu og kryddið með óreganó, salti og pipar.  Setjið þær í ofnfast mót.

 

Hrærið saman matreiðslurjóma, chilisósu, bbq-sósu og tómatsósu (eða aðeins chili tómatsósuna ef hún er notuð). Hellið rjómasósunni yfir kjúklinginn. Skerið banana langsum og svo í tvennt. Leggið þá ofan á kjúklinginn. Skerið beikonið smátt og brúnið það (eða notið tilbúið, skorið og steikt). Dreifið beikonbitunum yfir réttinn og kryddið jafnvel með aðeins meira af pipar og óreganó (eða eftir smekk).

 

Bakið réttinn í um 10 mínútur. Takið hann þá úr ofninum og stráið rifnum mozzarellaosti yfir. Bakið réttinn í um 10 mínútur til viðbótar. Skerið spergilkálið örsmátt. Áður en rétturinn er borin fram er salthnetum og spergilkáli stráð yfir.

 

Berið fram t.d. með hrísgrjónum og grænni salatblöndu.

Höfundur: Theodóra J. Sigurðardóttir Blöndal