- +

Gözleme - fyllt flatbrauð með kryddaðri hakkblöndu

Fylling:
ólífuolía
300 g spínat
sjávarsalt og svartur pipar
1 stk. lítill laukur, fínsaxaður
2 stk. hvítlauksrif, marin
500 g nautahakk
1 msk 1-2 msk harissamauk, magn fer eftir smekk
1 tsk cummin
1 tsk þurrkað kóríander
⅔ dl ítölsk steinselja, fínsöxuð
1 stk sítróna, börkurinn
svartur pipar
200 g fetakubbur, mulinn
2½ dl Búri eða Havarti, rifinn

Gözleme deig:
1¾ dl volgt vatn
1 tsk þurrger
½ tsk sykur
1 tsk sjávarsalt
hveiti eins og þurfa þykir

Aðferð:

Fylling:
Steikið spínatið í skömmtum í stutta stund upp úr ólífuolíu og saltið og piprið örlítið. Látið kólna á eldhúspappír. Mýkið laukinn og hvítlaukinn á pönnu í 1 msk af ólífuolíu. Bætið hakkinu út á pönnuna, harissamaukinu og kryddum. Steikið þar til allur vökvi hefur gufað upp. Setjið hakkið svo til hliðar, piprið og bætið sítrónuberkinum saman við. Hakkið verður að vera orðið alveg kalt áður en það fer í deigið.

Deig:
Þá er komið að deiginu. Leysið þurrgerið upp í vatninu, hrærið þar til byrjar að freyða og bætið þá sykri og salti saman við. Hellið hveitinu saman við smátt og smátt þar til þið eruð komin með mjúkt og óklístrað deig í hendurnar. Hnoðið deigið í stutta stund og látið í olíuborna skál Leggið klút yfir og látið hefast á hlýjum stað í 20 mínútur. Þegar deigið hefur hefast er það hnoðað niður og skipt í fjóra hluta. Ofninn er stilltur á 180°C og hvert deigpartur flattur út í ferning u.þ.b. 25x35 cm, svona lauslega miðað en þarf alls ekki að vera nákvæmt. Loks er fyllingin sett ofan á helming hvers parts. Fyrst setjið þið ¼ af hakkinu, þá ¼ af spínati, svo ¼ af muldum feta og loks ¼ af Havarti ostinum. Að lokum eru partarnir lagðir saman og brotið upp á kantana til að loka vel. Það er ágætt að þrýsta síðan á samskeytin með gaffli til að tryggja að ekkert leki út. Þessu góðgæti er síðan raðað á ofnplötu klædda bökunarpappír og hver ferhyrningur penslaður með ólífuolíu. Bakið í 15-20 mínútur eða þar til gullið og girnilegt.

Gott er að bera Gözleme fram með sítrónubátum og ógrynni af grískri jógúrt.

Höfundur: Erna Sverrisdóttir