- +

Piparkökuskreyting

Piparkökur:
125 g smjör við stofuhita (lint og mjúkt)
2 dl sykur
1¼ dl síróp
1 stk. egg
¾ dl mjólk
1 msk. kanill
1 msk. engifer
1 msk. kardemomma
½ tsk. negull
2 tsk. matarsódi
7 dl hveiti (7-8 dl)

Sykurbráð:
3 dl sykur (3-4 dl)

Aðferð:

Piparkökur:

Þeytið smjör og sykur vel og lengi þar til sykurinn hefur leysts upp, bætið sírópi við og þeytið áfram. Bætið svo við egginu ásamt mjólkinni.

Blandið hveiti, kryddum og matarsóda saman. Hrærið því saman við smjörblönduna og þeytið í gott deig. Ef það loðir eitthvað illa saman er hægt að bæta við örlitlu sírópi til viðbótar.

Þegar deigið er tilbúið er því vafið inn í plastfilmu og geymt í kæli í 12-24 tíma.

Hitið ofnin í 200°C. Fletjið út deigið og mótið úr því það sem þið ætlið ykkur. Stjörnur eða hús? Það er fallegt að vera með stórar stjörnur neðarlega og svo vera með minni ofar.

Bakið kökurnar og látið þær kólna vel áður en þær eru skreyttar með glassúr.

 

Að búa til piparkökuskreytinguna:

Rúllið kartoninu saman í ,,strút” eða kramarhús. Ég hef það um 30-40 cm á hæð.

Festið það saman með lími eða með límbandi. Látið svo á fallegan disk.

 

Sykurbráð:

Hitið pönnu og hellið á hana svona 3-4 dl af sykri. Látið sykurinn bráðna.

Smyrjið kökurnar örlítið að aftan með sykurbráðinni og tyllið kökunum neðst á kramarhúsið. Haldið áfram og festið kökurnar fallega koll af kolli þar til kramarhúsið er þakið piparkökum.

Dustið flórsykri yfir, skreytið ef þið viljið eitthvað meira og setjið á fallegan stað. 

Höfundur: Theodóra J. Sigurðard. Blöndal