- +

Piparkökumarengs í glasi

Innihald:
3 eggjahvítur
170 g sykur
100 g piparkökur, hakkaðar
½ l rjómi frá Gott í matinn

Púðursykurskaramella:
100 g púðursykurskaramella
½ dl rjómi frá Gott í matinn
30 g smjör
¼ tsk. salt
½ tsk. vanilludropar

Aðferð:

Fyrir 4 – 6

Þeytið eggjahvítur og bætið sykri saman við. Þeytið þar til  marengsinn verður stífur og stendur. Hakkið piparkökurnar gróflega niður og hrærið saman við marengsinn með sleif. Setjið smjörpappír á bökunarplötu og myndið hring úr marengsinum. Bakið við 150 gráðu hita í 30-40 mínútur eða þar til marengsinn er orðinn þurr viðkomu. Leyfið marengsinum að kólna og brjótið hann svo gróflega niður.

Útbúið nú karamelluna með því að setja allt hráefni saman í pott yfir meðalháum hita og hrærið af og til. Þegar púðursykurinn er alveg bráðnaður saman við allt látið þá karamelluna sjóða í nokkrar mínútur, hrærið stanslaust svo hún brenni ekki við. Því lengur sem þið hitið hana því þykkri verður hún. Setjið karamelluna í ílát/krukku og kælið t.d. inni í ísskáp í örstutta stund. Karamellan má ekki vera sjóðandi heið þegar hún er sett ofan á rjómann því annars bráðnar hann.

Þeytið rjóma á meðan að karamellan er að kólna. Setjið rjóma í glas/skál, setjið marengsbita ofan á og síðan karamellu. Endurtakið þar til glasið er orðið fullt. Setjið karamellu ofan á toppinn ásamt hökkuðum piparkökum. Skeytið með piparkökum að vild. Geymið í kæli þar til borið er fram.

Einnig er hægt að gera marengsköku úr þessari uppskrift en þá mæli ég með að tvöfalda marengsinn og gera tvo botna. Setja rjóma á milli og nóg af karamellu ofan á ásamt piparkökum.

Höfundur: Thelma Þorbergsdóttir