Jólalegt Ris a la mande | gottimatinn.is
- +

Jólalegt Ris a la mande

Innihald:
2½ dl grautargrjón
4 dl vatn (4-6 dl)
1 l mjólk (til að byrja með)
1 msk smjör
vanilludropar eftir smekk, eða vanillustöng
nokkur korn af salti
2 dl flórsykur
100 g hvítt súkkulaði (má alveg sleppa)
½ l þeyttur rjómi

Súkkulaðirjómasósa
250 ml rjómi
100 g mjólkursúkkulaði
100 g suðusúkkulaði

Aðferð:

1. Sjóðið grautargrjónin í vatni alveg sér. Lofið mér að nota þessi rúnuðu grautargrjón ef þið hafið tök á, önnur grjón verða ekki eins. 

2. Þegar grjónin eru soðin takið þau af hitanum og setjið til hliðar. Hitið mjólkina, segjum einn lítra pg setjið góða smjörklípu ásamt smá skvettu af vanilludropum út í. Það er líka hægt að setja kanilstangir í mjólkina. Auðvitað líka anis og kardemommukjarna. Setjið líka nokkrar matskeiðar af flórsykri í mjólkina og örlítið salt.

3. Þegar mjólkin er orðin heit mokið þið grjónunum yfir í mjólkina og hrærið á meðan. Hellið meiri mjólk saman við ef ykkur finnst þurfa og bætið grjónum við þangað til að kominn er góður grautur. Með þessum hætti komið þið í veg fyrir bruna á grautnum.

4. Þegar grauturinn er tilbúinn er hvíta súkkulaðinu hrært saman við ef þið viljið nota það. Síðan þarf grauturinn að kólna - jafnvel fram á næsta dag. Áður en grauturinn er borinn fram er þeyttum rjóma bætt við og það þarf hræra hann varlega saman við grautinn við ásamt flórsykri. Smakkið til og bætið við flórsykri eftir smekk. 

Með grautnum er hægt að bjóða upp á þá sósu sem við elskum mest t.d. berjasósu úr hindberjum, kirsuberjasósu, rjómasúkkulaðisósu, marssósu eða setja appelsínu- og mandarínubita út í grautinn. 

 

Súkkulaðirjómasósa, aðferð:

Hitið rjómann að suðu og látið súkkulaðið bráðna saman við. Þið getið líka bætt mars-súkkulaði við rjómann eða hverju öðru sem hugurinn girnist.

 

Höfundur: Theodóra J. Sigurðardóttir Blöndal