Dúnmjúkir kanilsnúðar í jólafötum | gottimatinn.is
- +

Dúnmjúkir kanilsnúðar í jólafötum

Innihald:
1 dl ylvolgt vatn
1½ tsk. þurrger
¾ dl sykur
125 g smjör, brætt
1 dl sýrður rjómi, 18%
2 stk. egg
8 dl hveiti eða eins og þurfa þykir
½ tsk. salt

Fylling:
50 g smjör, brætt
⅔ dl púðursykur
4 msk. síróp
2 tsk. kanill

Glassúr:
2½ dl flórsykur
⅔ dl sýrður rjómi, 18%
1 msk. rjómi

Skraut:
mulinn Bismark brjóstsykur

Aðferð:

Einföld uppskrift dugar í u.þ.b. 12 stk.

1. Leysið gerið upp í vatninu. Bætið sykri út í og þá smjöri og sýrðum rjóma. Hrærið. Pískið eggjum saman við. Setjið salt út í og svo hveiti smátt og smátt eða þar til þið hafið óklístrað en létt deig. Hnoðið í 5 mínútur. Setjið deigið í skál og hyljið með plastfilmu. Látið hefast í klukkutíma.

2. Hnoðið deigið aðeins niður og fletjið út í ferning sem er u.þ.b. 45 x 45 cm. Penslið með bræddu smjöri og sírópi. Sáldrið kanil og púðursykri yfir. Rúllið upp og skerið í 12 bita. Leggið snúðana á ofnplötu klædda bökunarpappír. Þrýstið á hvern og einn með lófanum þannig að þeir fletjist örlítið út. Bakið í u.þ.b. 20 mínútur við 180°. Látið snúðana kólna aðeins áður en glassúrinn fer ofan á.

3. Hrærið saman öllum hráefnum sem fara í glassúrinn og smyrjið ofan á snúðana. Sáldrið mulnum brjóstsykri yfir, eftir smekk.

Höfundur: Erna Sverrisdóttir