- +

Grænmetislasanja Teddu

Innihald:
2 stk. gulir laukar, saxaðir
1 búnt spergilkál, smátt saxað nema stilkar
3 stilkar sellerí (3 - 6)
1 box sveppir, sneiddir
2 stk. eggaldin, skorin í sneiðar
½ stk. kúrbítur, smátt saxaður
2 stk. sætar kartöflur, skornar í teninga
1 handfylli af söxuðum döðlum
40 g suðusúkkulaði
2 dósir niðursoðnir, saxaðir tómatar
2 dl vatn
2 grænmetisteningar
Salt, svartur pipar, chiliflögur eftir smekk
Olía til steikingar
1 pakki lasanja blöð
Mozzarella ostur, rifinn
Parmesan, rifinn
Salat að eigin vali

Aðferð:

Hitið ofninn í 180 °C.

Skerið allt grænmetið. Skerið laukinn í sneiðar, spergilkálið mjög smátt og sleppið stilkinum en það er auðvitað val, selleríið er skorið í sneiðar eins og sveppirnir. Kúrbíturinn er skorinn smátt.

Steikið grænmetið í olíunni og á meðan er eggaldinið skorið langsum, penslað með olíu og hitað í ofninum. Kartöflurnar eru skornar í teninga (því smærri, því fljótari eru þeir að steikjast) og sett í ofninn og látnir verða mjúkir. 

Þegar grænmetið á pönnunni er orðið mjúkt er tómötunum hellt saman við ásamt vatni. Kryddið eftir smekk og bætið við döðlunum. Súkkulaðið er sett saman við alveg í lokin. Látið smásjóða á meðan grænmetið í ofninum er að klárast.

Svo er bara að púsla þessu saman í form. Notið ekki allar kartöflurnar, geymið til að strá yfir í lokin. Sósa fyrst, lasanjablöðum og eggaldin raðað, sósa yfir, kartöflur og svo framvegis. Stráið ost yfir og vippið inn í ofninn og bakið í 30- 40 mínútur.

Látið standa og kólna aðeins áður en þið berið matinn fram. Bjóðið upp á gott salat með matnum og rifið helling af parmesanosti yfir.

Höfundur: Theodóra J. Sigurðard. Blöndal