- +

Vatnsdeigsbollur með súkkulaðiglassúr

Vatnsdeigsbollur:
125 g smjör
230 ml vatn
150 g hveiti
½ tsk. salt
1 tsk. lyftiduft
2 egg

Jarðarberjafylling:
400 ml rjómi frá Gott í matinn
2 msk. sykur
250 g fersk og vel stöppuð jarðarber (eða maukuð í blandara)

Súkkulaðifylling:
400 ml rjómi frá Gott í matinn
200 g súkkulaði- og heslihnetusmjör

Súkkulaðiglassúr:
100 g smjör (brætt)
350 g flórsykur
2 msk. bökunarkakó
2 tsk. vanilludropar
2 msk. kaffi
2 msk. vatn

Aðferð:

Vatnsdeigsbollur:

Hitið ofninn 185°C.

Bræðið smjörið í potti og hellið vatninu þá saman við, hitið að suðu og leyfið síðan hitanum að rjúka aðeins úr.

Blandið saman hveiti, lyftidufti og salti og hrærið saman við smjörblönduna með sleif þar til kekkjalaus deigkúla myndast í pottinum..

Pískið saman eggin í skál og leggið til hliðar.

Flytjið deigkúluna yfir í hrærivélarskál með K-inu. Leyfið mesta hitanum að rjúka úr með því að hræra deigið á lægsta hraða stöku sinnum í um 10 mínútur.

Bætið þá eggjablöndunni saman við í litlum skömmtum og skafið niður í milli. Deigið þarf að vera nægilega þykkt til að það leki ekki niður þegar á plötuna er komið svo skiljið frekar smá eftir af eggjablöndunni fremur en að fá of þunnt deig en venjulega er hægt að nota bæði eggin (ekki nema þau séu mjög stór).

Notið skeiðar eða sprautupoka og skiptið niður í 16-18  bollur á 2 bökunarplötum íklæddum bökunarpappír.

Bakið í 20-25 mínútur og alls ekki opna ofninn fyrr en að 15 mínútum liðnum í það minnsta því annars er hætta á að bollurnar falli.

Kælið og útbúið glassúr og fyllingu á meðan. Athugið að nóg er að útbúa aðra hvora fyllinguna fyrir þennan fjölda af bollum eða minnka hvora um sig um helming. 

 

Jarðarberjafylling:

Þeytið saman sykur og rjóma.

Vefjið stöppuðum jarðaberjum saman við rjómann og sprautið á hverja bollu.

 

Súkkulaðifylling:

Þeytið rjómann.

Vefjið súkkulaðismjörinu saman við blönduna og sprautið á hverja bollu (leyfið marmaraáferðinni að halda sér svo ekki hræra of mikið).

 

Súkkulaðiglassúr:

Setjið öll hráefnin saman í skál og pískið saman, smyrjið á bollurnar með skeið/litlum spaða.

Gaman að setja kökuskraut, hnetukurl eða annað lítið sælgæti á toppinn til skrauts.

Höfundur: Berglind Hreiðarsdóttir