- +

Sítrónuískaka með karamellu

Botn:
230 g piparkökur
130 g smjör

Sítrónuís:
6 stk. eggjarauður
6 msk. sykur
170 g púðursykur
½ tsk. sítrónudropar
börkur af einni sítrónu
6 dl rjómi
200 g Síríus pralín með karamellufyllingu
½ dl karamellusíróp

Aðferð:

Setjið bökunarpappír í botninn á hringlaga smelluformi um 23 cm að stærð. Setjið piparkökur í matvinnsluvél og hakkið þar til þær eru fínmalaðar. Bræðið smjör og blandið vel saman við. Setjið piparkökurnar í formið og þrýstið vel niður og upp á hliðar formsins. Gott er að nota glas til þess að þrýsta vel niður í botninn á forminu.

Þeytið eggjarauður og sykur saman þar til blandan verður ljós og létt (ef þið viljið getið þið þeytt eggjahvíturnar og blandað þeim saman í lokin eða nýtt þær í marengs). Blandið púðursykri varlega saman við með sleif. Setjið sítrónudropa og rifinn sítrónubörk saman við og hrærið vel. Þeytið rjóma og blandið honum saman við með sleif. Hrærið þar til allt hefur blandast vel saman. Skerið pralín súkkulaðið með karamellu gróflega niður og blandið saman við ísblönduna. Hellið ísblöndunni í formið ofan á piparkökubotninn. Hellið karamellusírópinu óreglulega yfir ísinn og hrærið með hníf með því að snúa honum í hringi þar til karamellan hefur blandast ágætlega vel saman við ísinn. Frystið í lágmark 5 klst. Skreytið ískökuna með rjóma, piparkökum og karamellusírópi að vild.

Þegar þið takið ísinn út er gott að láta hann standa í nokkra stund við stofuhita. Gott er strjúka hliðar formsins með volgri tusku áður en þið losið ískökuna úr forminu.

Ísinn geymist vel í 3 mánuði í fyrsti. 

Höfundur: Thelma Þorbergsdóttir