Skyrkaka með berjum og hvítu súkkulaði | gottimatinn.is
- +

Skyrkaka með berjum og hvítu súkkulaði

Innihald
100 g hafrakex
100 g smjör
¼ l rjómi
500 g skyr með bláberjum og hindberjum
125 g bláber
125 g hindber
100 g hvítt súkkulaði

Aðferð

Setjið hafrakex í matvinnsluvél og hakkið þar til kexið er orðið fínmalað. Bræðið smjör og hellið saman við kexið og hrærið vel saman. Hellið kexblöndunni í hringlaga form ca. 22 cm stórt og þrýstið því vel niður í botninn og upp á hliðar formsins. Gott er að nota botninn á glasi til þess að þrýsta kexinu vel niður. Þeytið rjómann og hrærið saman við skyrið þar til allt hefur blandast vel saman. Hellið skyrblöndunni yfir kexbotninn og sléttið út með sleif. Setjið bláber og hindber jafnt og þétt yfir kökuna. Bræðið hvítt súkkulaði yfir vatnsbaði og hrærið stanslaust þar til súkkulaðið hefur náð að bráðna alveg, passið að súkkulaðið sé ekki mjög heitt þegar það er sett á kökuna. Dreifið hvíta súkkulaðinu óreglulega yfir berin og setjið í kæli þar til kakan er borin fram.

Höfundur: Thelma Þorbergsdóttir