- +

Hindberjapönnukökur með hindberjasósu, grískri jógúrt og karamellusósu

Pönnukökur
1¼ dl hveiti
1 msk sykur
1¼ dl mjólk
3 msk kókosmjöl
2 stk. stór egg
1¼ dl matreiðslurjómi
nokkrir dropar af rauðum matarlit
1 msk hindberjasósa (sjá uppskrift að neðan)
nokkur frosin eða fersk hindber, til skrauts
flórsykur, til skrauts
500 g grísk jógúrt

Hindberjasósa
250 g frosin hindber
⅔ dl sykur

Karamellusósa
1¼ dl matreiðslurjómi
75 g smjör
1¼ dl púðursykur
sjávarsalt af hnífsoddi

Aðferð:

Best er að byrja á hindberjasósunni. Sjóðið saman sykur og frosin hindber í potti. Látið suðuna koma upp á lágum hita og hækkið hitann síðan og látið sósuna malla í fimm mínútur eða svo. Sigtið sósuna og setjið til hliðar.

Pönnukökudeigið er gert á hefðbundinn hátt. Setjið þurrefnin saman í skál. Pískið vökva saman og blandið þurrefnunum saman við smátt og smátt. Best er að geyma deigið í 30 mínútur eða lengur. Pönnukökurnar eru síðan steiktar á pönnukökupönnu og látið rjúka úr þeim á grind áður en þeim er staflað.

Karamellusósan er afar einföld en jafnframt sérlega ljúffeng, t.d. með ís eða sem krem yfir köku. Setjið öll hráefnin í lítinn pott og látið þau bráðna saman við lágan hita til að byrja með. Þegar allt er bráðnað má hækka hitann aðeins og leyfa sósunni að bullsjóða í 8 mínútur, en þá er hún tilbúin.

Samsetningin er skemmtileg. Byrjið á að maka hindberjasósu á helming hverrar pönnuköku og setjið væna slettu af grískri jógúrt á ¼ part. Ein stór dós af grískri jógúrt dugar á átta pönnukökur og gott er að hræra aðeins upp í henni áður en hún er sett á pönnsurnar. Leggið síðan pönnukökurnar saman, fyrst til helminga og síðan aftur til helminga, svo úr verður einn fjórði. Raðið pönnukökunum á diska, dreifið flórsykri og hindberjum yfir. Að lokum er rétturinn fullkomnaður með volgri karamellusósunni.

Höfundur: Erna Sverrisdóttir