Grænmetisborgari í heimatilbúnu brauði
Miðlungs
- +

Grænmetisborgari í heimatilbúnu brauði

Brauð, innihald:
2 dl mjólk
½ msk síróp
1 msk olía
5 dl hveiti
1 tsk þurrger
1 tsk salt
1 msk sesamfræ
1 stk egg til að pensla

Grænmetisborgari, innihald
1 stk bökunarkartafla, smátt skorin og soðin
1 stk sæt kartafla, smátt skorin og soðin
1 dl rauðar linsubaunir soðnar í 2 dl vatni -eða-
1 dós kjúklingabaunir (hægt að nota í staðinn fyrir linsubaunir)
1 dl quinoa-korn soðin í 2 dl vatni eða sama magn af hýðisgrjónum
1 stk gulur laukur, smátt saxaður
½ stk piparostur eða meira, rifinn
haframjöl og hveiti eftir þörfum
salt, pipar og nokkrar chiliflögur

Aðferð:

Hamborgarabrauð, aðferð:

1. Mjólk, síróp og olía er hitað í 37 °C, t.d þegar litla fingur er dýft ofan í þá á þetta að vera volgt.

2. Blandið saman helmingnum af hveitinu með þurrgeri og salti.

3. Hellið vökvanum saman við hveitið og hrærið. Bætið afganginum af hveitinu við eftir þörfum og hnoðið þar til komið er gott deig.

4. Látið deigið hefast í 20-30 mínútur á hlýjum stað.

5. Mótið bollur og setjið þær á bökunarplötu og aftur á hlýjan stað þar sem þær eiga að hefast þar til þær eru rúmlega tvöfaldar að stærð. Úr þessu degi verða 6 bollur.

6. Þegar bollurnar hafa hefast eru þær penslaðar með þeyttu eggi og kryddi stráð yfir þær. Veljið eitthvað krydd með lit í eins og t.d. steinselju, chiliflögur og auðvitað nokkrar saltflögur. Sesamfræin standa líka alltaf fyrir sínu.

7. Bakið við 200°C í 8 mínútur.

 

Grænmetisborgari, aðferð:

1. Sjóðið kartöflur, grjón og linsubaunir. Ef þið notið kjúklingabaunir eru þær teknar beint úr dósinni en vökvanum hellt af.

2. Setjið kartöflur og baunir í matvinnsluvél og maukið. Það er auðvitað líka hægt að mauka þetta í skál með stappara.

3. Setjið blönduna í skál. Bætið við rifna piparostinum og smakkið til með salti og pipar.

4. Bætið við haframjöli og hveiti eftir þörfum til að þykkja deigið - það á að vera hægt að móta það í buff. Stundum þarf aðeins meira af hveiti og haframjöli.

5. Þegar deigið er tilbúið mótið þið hamborgara, veltið þeim upp úr haframjöli og steikið þannig að þeir verða gylltir og fallegir.

 

Í hamborgarabrauðið setur þú að sjálfsögðu það sem þú vilt sem meðlæti og er í mestu uppáhaldi hjá þér.

 

 

Höfundur: Theodóra J. Sigurðardóttir Blöndal