Tinna Alavis
Stökkur cous cous kjúklingur með guacamole og mozzarella
13. apríl 2016

Stökkur cous cous kjúklingur með guacamole og mozzarella

Ég eldaði þennan rétt um daginn og hann er sérstaklega bragðgóður. Mig langaði að deila honum með ykkur :)

Þennan rétt er hægt að setja í eldfast mót daginn eftir, dreifa mozzarella osti yfir og setja inn í ofn í 15-20 mínútur á 180°C.

Hér eru öll hráefnin sem þarf í réttinn:

1 bakki kjúklingalundir
2 bollar cous cous
2 bollar sjóðandi heitt vatn
1 bolli hveiti
2 egg og smá mjólk til þess að píska saman við
Ólífuolía eða íslenskt smjör til steikingar

Guacamole: 

Tvö vel þroskuð avocado
2 msk. sýrður rjómi
1/2 bolli ferskt kóríander
Nokkrir litlir tómatar, skornir mjög smátt
1/2 rauðlaukur, skorinn mjög smátt
2 hvítlauksrif
Smá bútur af fræhreinsuðu, rauðu chili
Safi úr hálfu lime (ef það er mjög safaríkt þá er gott að miða við 1 tsk.)
Smá salt

 

Aðferð:

Ég byrja á því að setja cous cous í skál og hella sjóðandi heitu vatninu yfir.
Því næst set ég plastfilmu yfir skálina og læt bíða í 10 mínútur.
Þá er cous cous-ið tilbúið og mér finnst gott að hræra vel upp í því með gaffli.

Þá er komið að því að velta kjúklingnum upp úr hveitinu, dýfa honum síðan ofan í eggjahræruna og síðast í cous cous-ið.

Þá lítur þetta svona út áður en kjúllinn fer á pönnuna.
Steikið kjúklinginn á miðlungs hita þar til hann er gegnum steiktur.
Það er gott að hafa í huga að ef þið veltið kjúklingnum mikið um pönnuna þá er hætta við að Cous cousið losni af.

Næst útbý ég guacamole og hérna eru hráefnin sem þarf í það.

Ég set avocado, kóríander og hvítlauk saman í matvinnsluvél, ásamt sýrða rjómanum og chili.
Ég kreisti lime einnig yfir en hins vegar sker ég rauðlaukinn og tómatana sér og bæti þeim við eftir á og hræri vel saman með gaffli.

Ég blanda þessu vel saman þar til allt er orðið vel mjúkt.

Ótrúlega hollt og gott með svo mörgu :)

Þegar ég ber kjúklingaréttinn fram þá finnst mér best að setja mikið af stökku cous cous ofan á og dreifa mozzarella osti yfir.

Þennan rétt er hægt að setja í eldfast mót daginn eftir, dreifa mozzarella osti yfir og setja inn í ofn í 15-20 mínútur.

Ég vona að þetta smakkist vel :)

 

Viltu fylgjast með þessum bloggara?

Skráðu þig til að fá nýjustu færslurnar sendar!