Tinna Alavis
Ljúffengar ítalskar kjötbollur
10. apríl 2017

Ljúffengar ítalskar kjötbollur

Í síðasta mánuði var ég stödd úti á Ítalíu í fríi en eitt af því sem heillaði mig mest við landið var maturinn. Ítalarnir vita alveg hvað þeir syngja þegar kemur að matargerð og tísku, það verður ekki tekið af þeim. Síðan ég kom heim til Íslands hef ég verið undir ítölskum áhrifum og hef verið að prófa mig áfram með ítalska rétti. Ég er búin að klára óvenju marga parmesan osta í matargerðina á stuttum tíma en í gær bjó ég til þessar ítölsku hakkbollur sem voru sérstaklega ljúffengar.

Hérna er allt sem þarf:

1 bakki nautahakk
1 poki rifinn mozzarella ostur frá Gott í matinn
1 pakki Ritz kex
1 sítróna
2 laukar
4 hvítlauksrif
pastasósa

Krydd:

Ítalskt panini krydd & Best á allt.

Meðlæti:

Nóg af parmesan eða Prima Donna osti, salat og pastasósa fyrir þá sem vilja.

Aðferð:

Setjið nautahakkið í stóra skál og kryddið vel. Kreistið safann úr einni sítrónu yfir hakkið. Skerið laukinn og hvítlaukinn frekar smátt og bætið út í skálina. Brjótið Ritz kexið niður í mylsnu og setjið saman við ásamt einum poka af mozzarella osti.

Hnoðið öllu vel saman og mótið litlar bollur. Steikið á miðlungs hita þar til þær eru farnar að brúnast vel. Ítölsku sósunni má hella yfir bollurnar rétt í lokin eða hafa hana til hliðar. Berið fram með nóg af rifnum parmesan osti og góðu salati.

Hakkbollurnar eru ekki síðri daginn eftir. Þá er hægt að sjóða pasta og hafa með þeim. Einnig er lítið mál að frysta þær og taka út þegar hentar.

Ég vona að þetta bragðist vel :)

Viltu fylgjast með þessum bloggara?

Skráðu þig til að fá nýjustu færslurnar sendar!